Fundargerð félagsmálaráðs 142

Fundargerð félagsmálaráðs 142

Fundur haldinn í félagsmálaráði Hornafjarðar í ráðhúsi þriðjudaginn 14. mars. 2006, kl 16.10. Mætt voru: Sigurbjörn Karlsson, Þorbjörg Helgadóttir, Björg Svavarsdóttir, Guðrún Jónsdóttir, Guðmundur Ingi Sigbjörnsson og Birgir Þ. Kjartansson félagsmálastjóri.

1. Einstaklingsmál

Fært í trúnaðarbók.

2. Önnur mál.

Félagsmálaráðs Hornafjarðar samþykkir eftirfarandi tvær verklagsreglur:

Verklag starfsmanns barnaverndarnefndar Hornafjarðar við könnun máls vegna gruns um kynferðisofbeldi gegn barni.

Ákvæði um tilkynningaskyldu er að finna í IV. Kafla barnaverndalaga nr. 80/2002 16. 17. og 18. Sjá einnig III kafla reglugerðar nr. 56/2004 um málsmeðferð hjá barnaverndarnefnd.

Ákvæði um nafnleynd tilkynnenda í 19. gr. 16. gr. kveður á um tilkynningaskyldu almennings.

17. gr. kveður á um sérstaka tilkynningaskyldu þeirra sem starfa sinna vegna hafa afskipti af börnum.

18. gr. kveður á um tilkynningaskyldu lögreglu.

19. gr. kveður á um nafnleynd tilkynnenda.

31. gr. kveður á um neyðarráðstafanir.

43. gr. kveður á um rannsóknarheimildir.

Starfsmanni ber í störfum sínum að vera óvilhallur og ber að vanda störf sín og gæta faglegra vinnubragða eins og best þykir. Starfsmaður skal sýna börnum, foreldrum og öðrum er tengjast máli nærgætni, er hann kannar og fer með mál og má ekki skýra óviðkomandi aðilum frá því er hann verður vísari í starfi sínu um einkahagi manna eða heimilisháttu.

Móttaka tilkynninga

Þegar starfsmaður barnaverndarnefndar tekur við tilkynningu þarf að gæta þess að ræða nafnleyndarákvæði þegar tilkynnt er skv. 16. gr. Starfsmaður þarf að fá sem gleggstar upplýsingar um barnið; nafn, heimilisfang, tengsl tilkynnanda við barnið og tilefni tilkynningarinnar.

Starfsmaður barnaverndarnefndar Hornafjarðar ber ábyrgð á meðferð þeirra tilkynningar skv. Barnaverndarlögum nr. 80/2002 þar sem rökstuddur grunur liggur fyrir um að barn hafi orðið fyrir kynferðislegu ofbeldi/áreitni. Um tilkynningar vegna gruns um að barn hafi verið beitt kynferðislegu ofbeldi gilda sömu vinnureglur og um aðrar tilkynningar sem berast barnaverndarnefnd Hornafjarðar, þ.e. um könnun máls, áætlun og meðferð skv. gildandi barnaverndarlögum.

Þegar tilkynning berst barnaverndarnefnd vegna gruns um að barn hafi orðið fyrir kynferðislegu ofbeldi eða rökstuddur grunur vaknar um slíkt hjá starfsmanni, skal hann taka ákvörðun um könnun máls skv. 21. gr. barnaverndarlaga eftir viðtal við tilkynnandann og forráðamenn ef við á, t.d. þegar meintur gerandi er utan fjölskyldunnar.

Lækniskoðun

Ef starfsmaður metur að barn þurfi bráðaskoðun læknis að halda, þarf í samráði við forráðamann að hafa samband við vakthafandi lækni HSSA og boða komu barns þangað. Starfsmaður sendir skriflega beiðni um læknisskoðun og sendir með barninu. Einnig þarf hann að meta hvort nauðsynlegt er að fylgja barni og foreldrum til læknisskoðunar. Séu áverkar á barni eða rökstuddur grunur um að barn hafi nýlega orðið fyrir alvarlegu kynferðisofbeldi ber að fá læknisskoðun svo fljótt sem auðið er.

Lögreglurannsókn

Starfsmaður barnaverndarnefndar Hornafjarðar getur óskað lögreglurannsóknar á meintum kynferðisbrotum. Skal það gert að vel athuguðu máli og þarf grunur um brot gegn barni að vera rökstuddur. Óskað skal samþykki forráðamanna fyrir rannsókn lögreglu, nema ríkir rannsóknarhagsmunir hamli því. Lögreglurannsóknar er óskað skriflega með bréfi til rannsóknarlögregludeildar. Vekja skal athygli forráðamanna á rétti þeirra sjálfra til að snúa sér beint til lögreglu og óska rannsóknar. Senda skal tilvísun til Barnahúss. Ekki er í öllum tilfellum tilefni til þess að óska lögreglurannsóknar við upphaf könnunar. Mál er þá annaðhvort kannað með ?könnunarviðtali? í Barnahúsi eða starfsmaður barnaverndarnefndar kannar málið nánar sjálfur, t.d. með viðtali við barn og aðstandendur.

Tilvísun í Barnahús

Þegar ákvörðun hefur verið tekin um tilvísun í Barnahúss skal starfsmaður barnaverndarnefndar fylla út tílvísunareyðublað og afla skriflegs samþykkis forráðamanna fyrir tilvísuninni. Starfsmaður ritar stutta samantekt um málið og lætur fylgja tilvísunarblaði. Í samantektinni skal getið um þær grunsemdir sem vaknað hafa, tilefni þeirra og atvikalýsingu. Einnig skal getið um einkenni hjá barninu og þróun þeirra, ef slíkt liggur fyrir í framburð barnsins, í hvaða samhengi hann kom fram, viðbrögð og túlkun aðila í nánasta umhverfi barnsins, tímasetningar og annað sem máli skiptir.

Starfsmaður sendir tilvísun og samantekt í Barnahús. Í Barnahúsi skal starfsmaður kynna málið og annast f.h. barnaverndarnefndar samstarf við þá aðila sem þar koma að málum. Hann skal einnig undirbúa barn og forráðamenn fyrir förina í Barnahús, er viðstaddur komu þeirra og viðstaddur rannsóknaviðtalið.

Starfsmaður skal sjá um að kynna foreldrum/forráðamönnum niðurstöður þeirra athugana sem gerðar eru á barninu og leita samstarfs þeirra um framhald málsins, s.s. gerð meðferðaráætlunar.

Neyðarmóttaka vegna nauðgana

Í málefnum yngri barna er meginreglan sú að leitað sé til Barnahúss, sbr. ofangreinda umfjöllun. Þegar 15 til 18 ára börn er að ræða, sem leita til lækna HSSA vegna nauðgana skal barnaverndarnefnd jafnframt gera ráð fyrir að leita verði til Neyðarmóttöku. Sé þörf á frekari sérfræðiþjónustu eða að barnaverndarnefnd komi að málinu að öðru leyti er það metið sérstaklega af barnaverndarnefnd Hornafjarðar.

Athuga þarf að 43. gr. barnaverndarlaga um rannsóknarheimildir gæti átt við ef grunur leikur á að barn hafi verið beitt kynferðisofbeldi af hálfu forráðamanns/ heimilismanns. Ef forsjárhafi er meintur gerandi og/eða samþykki fæst ekki, gæti þurft að beita neyðarráðstöfun skv. 31. gr. Barnaverndalaga.

Samþykkt í Félagsmálaráði Hornafjarðar, 14. mars 2006 Reglur þessar öðlast gildi við staðfestingu Bæjarstjórnar Hornafjarðar

Verklagsreglur um tilkynningarskyldu starfsfólks Leikskólanna Lönguhóla og Krakkakots og starfandi dagforeldra á Hornafirði til barnaverndarnefndar

Verklagsreglurnar eru unnar í samstarfi við leikskólanna og barnaverndarnefndar

1.1. Tilkynningarskylda þeirra sem afskipti hafa af börnum

?Hverjum þeim sem stöðu sinnar og starfa vegna hefur afskipti af málefnum barna og verður í starfi sínu var við að barn búi við óviðunandi uppeldisskilyrði, verði fyrir áreitni eða ofbeldi eða að barn stofni heilsu sinni og þroska í alvarlega hættu er skylt að gera barnaverndarnefnd viðvart. Sérstaklega er leikskólastjórum, leikskólakennurum, dagmæðrum, skólastjórum, kennurum, prestum, læknum, tannlæknum, ljósmæðrum, hjúkrunarfræðingum, sálfræðingum, félagsráðgjöfum, þroskaþjálfum og þeim sem hafa með höndum félagslega þjónustu eða ráðgjöf skylt að fylgjast með hegðun, uppeldi og aðbúnaði barna eftir því sem við verður komið og gera barnaverndarnefnd viðvart ef ætla má að aðstæður barns séu með þeim hætti sem lýst er í 1. mgr. Tilkynningarskylda samkvæmt þessari grein gengur framar ákvæðum laga eða siðareglum um þagnarskyldu viðkomandi starfstétta?

Barnavernarlög nr. 80/2002 17.gr.

1.2 Tilkynningarskylda vegna þungaðra kvenna

Tilkynningarskyldan gildir einnig um þungaðar konur sem stofna heilsu eða lífi ófædds barns síns í hættu með óviðunandi eða háskalegu líferni, t.d. með ofneyslu áfengis eða fíkniefnaneyslu.

Barnaverndarlög nr. 80/2002 3.mgr. 21. gr.

Með þessum verklagsreglum er til þess ætlast að starfsmenn leikskóla og dagforeldra meti hvort ástand, líðan eða umönnun barna sé þannig háttað að tilkynna eigi um það til barnaverndarnefndar þar sem barnið býr. Tilkynna þarf um grun ekki aðeins staðfestar sannanir. Það er síðan barnaverndarnefnd og /eða starfsmanns hennar að meta hvort grunur sé nægilega rökstuddur og taka ákvörðun um frekari könnun í framhaldi af því.

1.3 Hver tilkynnir og hvernig

Gert er ráð fyrir að tilkynnt sé í nafni leikskóla og að tilkynningin sé á ábyrgð leikskólastjóra en ekki einstakra starfsmanna. Leikskóli nýtur ekki nafnleyndar sbr. 19. gr. barnaverndarlaga. Þegar tilkynnt er skal það gert í samráði við leikskólastjóra. Mælt er með að tilkynningar séu gerðar skriflega, en gefist ekki tími til þess má tilkynna símleiðis.

1.4 Upplýsingar gagnvart barnaverndarnefnd

Rétt þykir að nefna hér stuttlega aðrar skyldur leikskóla og dagmæðra skv. Barnaverndarlögum. Mikilvægt er fyrir barnaverndarnefndir að eiga greiðan aðgang að nauðsynlegum upplýsingum um börn og foreldra við könnun barnaverndarmáls til að meta aðstæður barnsins. Upplýsingaskyldan gildir óháð því hvort viðkomandi stofnun hefur tilkynnt um málið til barnaverndarnefndar eða ekki. Þessi ákvæði eru tiltekin í 44. gr. Barnaverndarlaga.

Barnaverndarnefnd Hornafjarðar óskar við könnun barnaverndarmála eftir skriflegum upplýsingum frá leikskólum og dagmæðrum. Er það gert skriflega með stöðluðu bréfi þar sem fram kemur hvaða upplýsinga um barnið er óskað.

Tilkynningu ber að beina til barnaverndarnefndar þar sem barnið býr.

Barnaverndarnefnd Hornafjarðar, sími: 470-8004, frá kl. 08:00-16:00.

Neyðarsími vegna barnaverndarmála á Hornafirði, GSM: 891-6393, frá kl: 16:00 virka daga og helgar. Einnig er hægt að tilkynna til neyðarþjónustu 112, þar sem neyðarvörður svarar á augabragði og kemur boðum til réttra aðila.

Upplýsingar um símanúmer hjá öðrum barnaverndarnefndum má finna á heimasíðu Barnaverndarstofu: htt://www.bvs.is þar er einnig að finna ýmsar gagnlegar upplýsingar um allar barnaverndarnefndir á landinu og barnaverndarstarf á Íslandi.

Samþykkt í Félagsmálaráði Hornafjarðar, 14. mars 2006.

 Félagsmálaráð tók fyrir drög og tillögur vegna veitingu námsstyrkja vegna sérstakra aðstæðna. Lagðar fram og kynntar á fundi félagsmálaráðs 31. 01.06. og síðan til umræðu og umfjöllunar á fundi ráðsins þann 28.02.06. Félagsmálaráð Hornafjarðar samþykkir í dag. 14.03.06., meðfylgjandi drög og tillögur vegna veitingu námstyrkja vegna sérstakra aðstæðna.

V. Kafli

Heimildir vegna sérstakra aðstæðna

Námsstyrkir

Námsstyrki er heimilt að veita í eftirfarandi tilvikum og miðast við grunnfjárhæð ásamt skólagjöldum og bókakostnaði:

• til einstaklinga 18-24 ára, sem ekki geta stundað nám við framhaldsskóla vegna fjárhagslegra og eða félagslegra erfiðleika og metur félagsmálaráð fjárhagsstöðu umsækjenda.
• til einstæðra foreldra 18-24 ára, sem ekki geta stundað nám við framhaldsskóla og hafa haft undir 75% af framfærslu grunni síðastliðna 12 mánuði. Skilyrði er að umsækjandi hafi átt í félagslegum erfiðleikum.
• til einstaklinga sem hafa verið atvinnulausir án bótaréttar eða þegið fjárhagsaðstoð í sex mánuði eða lengur og hafa ekki lokið grunnnámi sem gefur rétt á námsláni.
• vegna ungmenna, 16 og 17 ára, er búa í foreldrahúsum og foreldrar þeirra hafa haft tekjur á eða undir framfærslu grunni a.m.k. undanfarna 12 mánuði. Skal sú aðstoð miða að því að greiða áætlaðan bókakostnað svo og skólagjöld einu sinni á vetri.

Sú aðstoð sem veitt er skal miða að því að greiða skólagjöld og áætlaðan bókakostnað, auk framfærslu þann tíma sem námið varir, þ.e. til fjárráða einstaklinga. Meðlag sem umsækjandi kann að fá reiknast honum til tekna. Tekjur sem umsækjandi kann að fá reiknast honum til tekna.

Við ákvörðun um beitingu heimildar til að veita fjárhagsaðstoð vegna náms ber að taka mið af því fjármagni sem Sveitarfélagið Hornafjörður ætlar til slíkrar aðstoðar í fjárhagsáætlun hverju sinni.

Samþykktir varðandi námskostnað skulu teknar fyrir hverja önn, þannig að aðstoð greiðist áfram þegar umsækjandi sýnir eðlilega námsframvindu. Leggja þarf inn umsókn tveimur mánuðum áður en nám hefst.

Starfsmaður skal meta námsframvindu í hverju tilviki miðað við aðstæður hvers og eins. Nemandi skal leggja fram yfirlit yfir skólasókn mánaðarlega og einkunnir í annarlok. Almennt viðmið er að lokið sé a.m.k. við 17,5 einingar á önn.

Miðað skal að því að námið leiði til þess að viðkomandi geti hafið nám síðar, sem er lánshæft hjá Lánasjóði islenskra námsmanna.

Einstaklingar sem stunda nám sem lánshæft er hjá L.Í.N. njóta ekki réttar til fjárhagsaðstoðar.

Heimildir vegna sérstakra aðstæðna eru samþykktar á fundi félagsmálaráðs Hornafjarðar þann, 14. mars 2006.

GREINARGERÐ

Endurskoðun reglna um fjárhagsaðstoð

Bæjarráð Hornafjarðar samþykkti á fundi sínum þann 19. janúar 2006 að fela félagsmálaráði að endurskoða reglur um fjárhagsaðstoð með það að markmiði að einstaklingar á aldrinum 18-24 ára geti sótt um framfærslustyrk til náms í framhaldsskóla. Halldóra Bergljót Jónsdóttir lagði fram minnisblað dags. 18. janúar varðandi málið.

Drög og tillögur vegna veitingu námsstyrkja vegna sérstakra aðstæðna voru kynntar á fundi félagsmálaráðs 31.janúar s.l. Félagsmálaráð Hornafjarðar fjallaði um reglurnar á fundi ráðsins þann 28. febrúar s.l. Fyrirliggjandi tillaga að breyttum reglum vegna sérstakra aðstæðna er samþykkt í félagsmálaráð á fundi þess 14. mars s.l.

Reglur þessar eru að mestu leyti unnar eftir leiðbeinandi reglum um fjárhagsaðstoð sem Félagsmálaráðuneytið í samvinnu við Samband íslenskra sveitarfélaga gaf út 15. maí 2004.

Einnig er stuðst við samþykktar reglur eftirfarandi sveitarfélaga um heimildir vegna sérstakra aðstæðna.

Félagsþjónusta Hafnarfjarðar.

Félagsþjónusta Akranesbæjar.

Félagsþjónusta A- Hún.

Félagsþjónusta Garðabæjar.

Félagsþjónusta Akureyrarbæjar.

Félagsþjónusta Seyðisfjarðar.

Félagsþjónusta Húnaþingi vestra.

 

Rétt er að benda á eftirfarandi lög:

1. Barnalög nr. 76/2003

Menntunarframlag

Vekja skal athygli 18 og 19 ára umsækjenda á menntunarframlagi, sem þeir geta sótt um hjá sýslumanni, sbr. 62. gr. barnalaga, nr. 76/2003. Á þetta við um þann hóp ungs fólks sem meðlag hefur verið greitt með fram að 18 ára aldri. Framfærsluskyldu lýkur er barn verður 18 ára. Skyldu til greiðslu meðlags lýkur fyrir þann tíma ef barn giftist nema sýslumaður ákveði annað. Framlag til menntunar eða starfsþjálfunar ungmennis er heimilt að ákveða samkvæmt kröfu þess allt til þess er það nær 20 ára aldri, sbr. 62. gr. barnalaga, nr. 76/2003. Framlög þessi verða þó ekki ákvörðuð lengra aftur í tímann en eitt ár frá því að krafa var sett fram nema sérstakar ástæður leiði til annars, sbr. 10. gr. barnalaga.

2. Lög um námsstyrki 2003 nr. 79 26. mars

Ríkissjóður veitir námsstyrki til jöfnunar á fjárhagslegum aðstöðumun nemenda í framhaldsskólum að því leyti sem búseta veldur þeim misþungum fjárhagsbyrðum eða efnaleysi torveldar þeim nám.

Námsstyrkir til jöfnunar á fjárhagslegum aðstöðumun nemenda í framhaldsskólum

Rétt er að benda á lög sem tóku gildi 1. júlí 2003 og fjalla um námstyrki til jöfnunar á fjárhagslegum aðstöðumun nemenda í framhaldsskólum. Styrkir eru eftirfarandi, sbr. 3. gr.: Dvalarstyrkur, sem samanstendur af ferðastyrk, fæðisstyrk og húsnæðisstyrk, skólaakstursstyrkur og sérstakir styrkir. Námsstyrkjanefnd auglýsir eftir umsóknum um styrki fyrir vor-og haustönn og úthlutar styrkjum. Menntamálaráðherra setur reglurgerð um ákvæði laganna þar sem mælt er fyrir um frest til að skila umsóknum o.fl. Félagsmálaráð telur eðlilegt aðvið gerð fjárhagsáætlunar sé gert ráð fyrir sérstakri fárveitingu vegna veitingu námsstyrkja.

Fundi slitið kl. 17:00