Um Grunnstoðir bæjarfélagsins
Hvað er það sem hin almenna fjölskylda hugsar um þegar hún flytur í nýtt bæjarfélag?
Það er ekki nóg að hafa vinnu. Hvar á fólk að búa? Komast börnin að í leikskóla? Er grunnskólinn og framhaldsskólinn sambærilegur gæðum miðað við aðra skóla landsins (og kannski sérstaklega skóla á höfuðborgarsvæðinu)? Er góð heilsugæsla á staðnum? Getum við hugsað okkur að eyða ævikvöldinu hér? Öll grunnþjónusta verður að vera til staðar eigi sveitarfélagið að geta vaxið.
Leikskólarnir okkar tveir Lönguhólar og Krakkakot eru til fyrirmyndar að mörgu leiti og komast færri að sem vilja. Sem er mergurinn málsins – það þarf að vera hægt að bæta við börnum á hverju hausti.
Skólarnir okkar eru mjög góðir að mörgu leiti en sumt er þarf að bæta verulega, t.d. námsárangur. Í samræmdu prófunum er árangur barnanna okkar um og undir meðallagi miðað við aðra nemendur á landinu. Betur má ef duga skal. Hefur það eitthvað með grunnþjónustuna að gera að við höfum ekki nægilega marga kennara á staðnum sem eru með réttindi og/eða reynslu? Innra starf skólanna er aftur á móti vaxandi og samfara góðum Framhaldsskóla og Háskólasetri eykst menntunarstigið í bænum. Það sem við, verðandi bæjarfulltrúar verðum að huga að er að gera umgjörðina betri. Við verðum til dæmis að leyfa tveggja skólastjóra kerfinu að þroskast og sýna hvað í því býr. Við verðum að hlúa að verkmenntakennslunni. Sá aðbúnaður sem verkmenntirnar hafa er alls ekki nægilega góður. Við viljum stefna að því að byggja upp nýtt verkmenntahús, þar sem smíðar, textíl, myndmennt og heimilisfræði fá þá aðstöðu sem þarf. Þar er einnig hægt að byggja upp aðstöðu til málmsmíða, sem Framhaldsskólinn gæti nýtt. Huga þarf að Heppuskóla, húsinu sem aldrei var ætlað að klárast. Vinstri Græn á Hornafirði vilja að skólinn sé í fararbroddi varðandi lausn félagslegra vandamála. Forvarnir eiga að hafa stóran sess í skólastarfinu, þar eru börnin mótuð í það sem koma skal. Þess vegna er góð samvinna félagsmálayfirvalda bæjarins, forvarnafulltrúa og lögreglu við skólana nauðsynlegur hornsteinn fyrir betra samfélag á Hornafirði. Einelti í skólum er samfélagslegt vandamál, sem við þurfum öll að koma að, ekki bara skólakerfið. Hér á landi var Grunnskóli Hornafjarðar einn af hornsteinum í Olveusar verkefninu svonefnda, nefnt eftir norska sálfræðingnum Dan Olveus. Það verkefni byggðist á reglum sem hver bekkur setti sér og varð til þess að stórminnka einelti í skólum. Börnin sjálf hugsuðu hvort um annað og stóðu saman. Þetta má ekki verða að einhverju átaki sem fjarar svo út – þetta verður að vera stanslaus vinna, nemenda, kennara, skólastjóra í samvinnu við félagsmálayfirvöld bæjarins.
Heilsugæslan okkar er ágæt. Hún hefur þó liðið fyrir tíð læknaskipti. Er eitthvað við grunnþjónustuna sem veldur því að enginn læknir hefur viljað setjast að hér? Hingað koma reglulega sérfræðingar s.s. augnlæknir, kvensjúkdómalæknir og sálfræðingur. Hvað með öldrunarlækni? Eldra fólk á nú oft ekkert svo hægt um vik að ferðast til Reykjavíkur til að fara til læknis. Og kannski síst þeir sem þurfa að leita til læknis.
Eldri íbúar Hornafjarðar hafa flestir ágæta þjónustu hér. Hvað köllum við ágætis þjónustu? Og við hvað miðum við? Allavega ekki okkur sjálf svo mikið er víst. Allt of margir virðast hugsa sem svo: Það er nú svo langt þangað til ég verð gamall/gömul, það verður allt öðruvísi þá. En það breytist ekkert nema við breytum því!
Skrifa athugasemd