Eflum íslenskan landbúnað og matvælaöryggi
Ríkisstjórn Samfylkingar og Sjálfstæðisflokks lagði í mars 2008 fram frumvarp til að innleiða matvælalöggjöf ESB. Frumvarpið var stutt af fulltrúa Framsóknarflokksins í sjávarútvegs- og landbúnaðarnefnd. Um innleiðinguna var samið við ESB af ríkisstjórn Sjálfstæðisflokks og Framsóknarflokks og leiddu ráðherrar Framsóknarflokksins viðræðurnar. Frumvarpið var meingallað og hrein ógn við matvælaöryggi, fæðuöryggi og störf í matvælaiðnaði og gekk einnig gegn neytendavernd, sanngjörnum viðskiptaháttum og umhverfisvernd.
Íslendingar eru í fararbroddi og til fyrirmyndar í Evrópu á sviði matvælaöryggis. Hér hefur tekist að halda salmonellu- og kamfýlóbaktersmitum í lágmarki og er hún mun lægri en í löndum ESB. Þessum árangri höfum við náð með þrotlausri vinnu og fjárfestingum undanfarin ár og byggt er á eftirlitskerfum og heilbrigðisstöðlum sem eru með því allra besta sem þekkist í heiminum. Fagaðilar telja að árangri okkar og matvælaöryggi sé stefnt í hættu með óheftum innflutningi á hráu kjöti, fóðri og öðrum landbúnaðarvörum. Búast mátti við, yrði frumvarpið að lögum, að markaðshlutdeild innflutts kjöts ykist verulega og starfsmönnum í matvælaframleiðslu þá líklega fækka um nokkur hundruð. Þessum breytingum hefði auk þess fylgt verulegur kostnaður, meira skrifræði og fyrirhöfn.
Tvær stórar verslunarkeðjur eru með um 80% markaðshlutdeild í smávöruverslun. Að óbreyttu frumvarpi er hætt við að þær nái enn meira valdi yfir íslenskum búvöruframleiðendum og fákeppni aukist, allt á kostnað neytenda. Hætt er við að innlendu vörunni verði ýtt aftast í hillurnar vegna þess að henni geti verslunarkeðjurnar skilað aftur til búvöruframleiðanda en ekki innflutta kjötinu. Þennan skilarétt viljum við í VG feigan.
Auknir flutningar matvæla milli landa auka brennslu jarðefnaeldsneytis og þar með útblástur gróðurhúsalofttegunda og aðra mengun. Slíkt brýtur gegn markmiðum sjálfbærrar þróunar og vinnur á endanum gegn fæðuöryggi.
VG lagðist einn flokka einarðlega gegn frumvarpinu á Alþingi og það varð ekki að lögum á síðasta þingi. Frumvarpið var lagt fram aftur á þessu þingi endurbætt en tryggir enn ekki matvælaöryggi landsmanna. Eftir stjórnarskiptin í febrúar fór Atli Gíslason, sem formaður sjávarútvegs- og landbúnaðarnefndar, vandlega yfir málið og forsögu þess og leitaði jafnframt til ýmissa sérfræðinga, m.a. ráðuneytisstarfsmanna og til fulltrúa hagsmunaaðila. Í ljós kom að fyrri ríkisstjórn Sjálfstæðisflokks og Framsóknarflokks hafði orðið á alvarleg samningsmistök. Hún gerði ekki fyrirvara um salmonellusmitun, eins og allar Norðurlandaþjóðir hafa náð fram og samdi ekki um aðrar varnir, m.a. gagnvart kamfýlóbaktersmitun. Innleiðing matvælatilskipunar ESB má aldrei stefna lýðheilsu í hættu og vera ógn við íslenska búfjárstofna.
Athugun á málinu og forsögu þess hefur sannfært okkur um að lögfræðilega og faglega er unnt að innleiða nýja matvælalöggjöf þannig að matvæla- og fæðuöryggi sé tryggt sem og störf í matvælaiðnaði, neytendavernd, sanngjarnir viðskiptahættir og umhverfisvernd. VG mun sem fyrr standa öflugan vörð um íslenskan landbúnað.
Atli Gíslason, formaður sjávarútvegs- og landbúnaðarnefndar Alþingis
Jón Bjarnason, alþingismaður
Arndís Soffía Sigurðardóttir, ferðaþjónustubóndi sem skipar 2. sæti VG í Suðurkjördæmi
Skrifa athugasemd