Ætlar ESB að gleypa okkur með húð og hári?
Margir virðast óttast það að Evrópusambandið bíði þess óþreyjufullt að Ísland sæki um aðild til þess eins að geta hér ráðskast með fólkið í landinu og auðlindir þess. Ég hef áður fjallað um auðlindinar, líkt og margir fleiri í þessari kosningabaráttu svo vonandi hefur auðlindadraugurinn verið kveðinn niður. En hvað með aðra þætti mannlífsins, mun Brussel ráða öllu, flyst stjórn landsins þangað með aðild? Svarið er nei, slíkt gerist ekki. Aðildarríki hafa framselt takmarkað vald til sambandsins. Þau málefni sem varða flest okkar mestu í daglegu líf, t.d. skattar, uppbygging menntakerfisins, heilbrigðiskerfisins og velferðarþjónustan eru öll á forræði aðildarríkjanna. Sama gildir um það sem varðar hjúskap, forsjá barna og dómskerfið almennt, þar verða engar breytingar með inngöngu í ESB. Það er hvergi á dagskrá að hrófla við þessu.
Það má í raun segja að flestar þær breytingar sem fólk í nýjum aðildarríkjum verður yfirleitt vart við við inngöngu í sambandið hafi þegar komið fram á Íslandi með EES. Róttækasta breytingin sem við yrðum flest vör við við inngöngu væri lækkandi vöruverð, meiri stöðugleiki, lækkandi vextir og afnám verðtryggingar eftir að stefnan er tekin á evruna. Aðildarumsókn og innganga í ESB mun hafa jákvæði árhrif á hagmuni heimilanna.
Anna Margrét Guðjónsdóttir
Höfundur skipar 4. sæti Samfylkingarinnar í Suðurkjördæmi
Skrifa athugasemd