Eru „hressilegar“ skattahækkanir lausnin?
Tekjur ríkisins hafa dregist verulega saman auk þess sem ábyrgðir hafa fallið á ríkissjóð. Ljóst er því að lítið er til skiptanna úr ríkiskassanum og við því verður að bregðast. Forystumenn núverandi ríkisstjórnar hafa gefið „hressilegum“ skattahækkunum undir fótin, eða eins og Indriði H. Þorláksson núverandi ráðuneytisstjóri fjármálaráðuneytis orðar það. Nú er staða íslenskra heimila og fyrirtækja veik sökum hárra vaxta og verðbólgu. Atvinnuleysi vex og fyrirtækin reyna að halda fólki í vinnu með því að lækka starfshlufall og laun starfsmanna sinna frekar en að grípa til uppsagna. Fjölskyldurnar berjast við að ná að greiða af lánum sínum og fyrirtækin sligast undan háum fjármagnskostnaði og slæmum aðgangi að lánsfé. Ég met stöðuna svo að fólkið í landinu og fyrirtækin megi ekki við frekari áföllum og tel því að skattahækkanir séu ekki sú lausn sem ríkisstjórnin á að grípa til.
En hvernig má þá bregðast við tekjusamdrætti ríkisins? Nær öll heimili landsins glíma nú við þetta sama verkefni. Þau bregðast við á þann hátt að draga saman rekstur, hagræða í innkaupum og segja upp óþarfa fastakostnaði. Ríkið verður að gera slíkt hið sama, þ.e. skera þarf burt alla fitu, leggja niður og sameina stofnanir, slá verkefnum á frest og leita við hverja ákvörðun hagkvæmustu lausna. Slíkar niðurskurðaraðgerðir eru óvinsælar og eflaust óþægilegt fyrir stjórnmálamenn að standa fyrir þeim. En nú þarf íslenska þjóðin einfaldlega á hugrökku fólki að halda í framvarðasveit íslenskra stjórnmála sem hefur kjark til þess að taka erfiðar ákvarðanir. Að öðrum kosti munu komandi kynslóðir fá það hlutskipti að standa skil á okkar rekstrarkostnaði og slíkt er ekki verjandi. Við niðurskurðinn skiptir forgangsröðun mestu máli og að gætt sé jafnræðis í aðgerðum. Öryggi landsmanna þarf að vera tryggt og aðgengi að grunnþjónustu.
Íslendingar þurfa nú að snúa bökum saman og leggja á hin úfna sæ sem framundan er næstu mánuðina. Ef við leggjumst saman á árarnar munum við komast að settu marki fyrr en ella. Markmiðið er að búa svo um hnútana að Íslendingar framtíðarinnar fái alist upp við bestu mögulegu lífsgæði í frjálsu og opnu landi þar sem tækifæri einstaklingsins til að njóta afraksturs eigin verka eru fyrir hendi.
Ég mæli með því að stjórnvöld einbeiti sér að hagræðingu í rekstri hins opinbera áður en farið er að tala um skattahækkanir.
Unnur Brá Konráðsdóttir er sveitarstjóri í Rangárþingi eystra og gefur kost á sér í 2. sæti á lista Sjálfstæðisflokksins í Suðurkjördæmi
Skrifa athugasemd