Kjartan Ólafsson gefur kost á sér í 2. sæti á lista sjálfstæðismanna í Suðurkjördæmi
Kjartan Ólafsson alþingismaður hefur ákveðið að gefa kost á sér í 2. sæti á framboðslista sjálfstæðismanna í Suðurkjördæmi, en um helgina má vænta þess að tekin verði ákvörðun um hvort efnt verður til prófkjörs eða stillt upp á listann með öðrum hætti. Kjartan tók fyrst sæti á Alþingi árið 2000 og hefur setið óslitið á þingi frá árinu 2003. Helstu áherslur Kjartans liggja á sviði menntunar- heilbrigðis- og atvinnumála en Kjartan er meðal annars formaður stóriðjunefndar Samtaka sunnlenskra sveitarfélaga Hann hefur verið formaður Sambands garðyrkjubænda um langt árabil, setið á Búnaðarþingi frá árinu 1995 og látið atvinnumál í kjördæminu til sín taka með margvíslegum hætti um áratugaskeið.
Kjartan lauk prófi frá Garðyrkjuskóla ríkisins og stundaði framhaldsnám við garðyrkjuskólana í Söhus og Beder í Danmörku. Hann starfaði sem ráðunautur hjá Búnaðarsambandi Suðurlands um tíu ára skeið, stýrði fjármálum sambandsins í rúman áratug og gegndi lengi störfum framkvæmdastjóra Steypustöðvar Suðurlands.
Á meðal stjórnmála-, félagsmála- og trúnaðarstarfa á undanförnum árum má nefna stjórnarsetu í Skógræktarfélagi Íslands, Landgræðslusjóði, Áburðarverksmiðju ríkisins, Framleiðnisjóði landbúnaðarins og réttargeðdeildinni að Sogni. Kjartan var formaður Skógræktarfélags Árnesinga í fimmtán ár, formaður heilbrigðisnefndar Ölfushrepps í tæp tíu ár og formaður umhverfisnefndar sveitarfélagsins Ölfuss í átta ár.
Kjartan hefur verið í forsvari fyrir sunnlensk sveitarfélög, fyrirtæki og einstaklinga varðandi uppbyggingu heilsársvegar um Kjöl og er varaformaður stjórnar Norðurvegar ehf sem vinnur að hagkvæmniathugun á þessari framkvæmd.
Hann var í stjórn og síðar formaður Félags ungra sjálfstæðismanna í Suðurlandskjördæmi, í stjórn sjálfstæðisfélagsins Óðins á Selfossi og hefur gegnt formennsku í kjördæmisráði Sjálfstæðisflokksins. Hann situr nú í allsherjarnefnd Alþingis, iðnaðarnefnd, menntamálanefnd og umhverfisnefnd auk þess að sitja í Íslandsdeild Norðurlandaráðs, en áður sat Kjartan meðal annars um nokkurra ára skeið í Íslandsdeild Vestnorræna ráðsins.
Sem formaður stóriðjunefndar Samtaka sveitarfélaga á Suðurlandi beitti Kjartan sér m.a. fyrir útgáfu ritsins ?Suðurland tækifæranna? fyrr á þessu ári en þar eru forsendur stóriðju og kröftugrar uppbyggingar atvinnulífs á Suðurlandi tíundaðar, meðal annars í tengslum við umtalsverðar hafnarframkvæmdir í Þorlákshöfn.
Kjartan er staðráðinn í að beita sér áfram af alefli í þágu atvinnulífs í kjördæminu. Hann á fjölbreyttri og fasælli reynslu sem hann vill nýta til frekari verðmætasköpunar og um leið bættra lífskjara í kjördæminu og öðrum dreifðari byggðum landsins.
Kjartan er kvæntur Örnu Kristínu Hjaltadóttur skrifstofumanni. Börn þeirra eru Hjalti Jón, Hugborg og Herdís Ólöf.
Skrifa athugasemd