Fjárhagsleg staða og íbúaþróun
Grein: Halldóra Bergljót Jónsdóttir þátttakandi í prófkjöri sjálfstæðismanna
Það var ljóst í upphafi þessa kjörtímabils að ekki yrði farið í stórar framkvæmdir vegna þess að byggingu Nýheima var nýlokið og vinna þyrfti úr skuldastöðunni. Það hefur gengið betur en áætlað var því Jöfnunarsjóður sveitarfélaga hefur verið okkur hagstæður og framlög úr honum verið meiri en reiknað var með, m.a. vegna góðæris í landinu og þar af leiðandi hafa farið hærri framlög í hann úr ríkissjóði. Við þurfum alltaf að vera vakandi yfir fjárhagslegri stöðu sveitarsjóðs. Ég tel að í upphafi nýs kjörtímabils sé tímabært að skoða rekstur sveitarfélagsins því við eigum alltaf að hafa það að markmiði að reyna að gera enn betur. Við stefnum á miklar framkvæmdir, sem er bygging nýrrar sundlaugar. En bæjarstjórn hefur ákveðið að 330 milljónir króna fari til þeirra framkvæmda. Einnig hefur verið ákveðið að bæta aðstöðu á íþróttasvæði.
Það er mitt álit sem og sveitarstjórnarmanna almennt að tekjuskipting milli ríkis og sveitarfélaga sé sveitarfélögunum ekki nógu hagstæð. Sveitastjórnarmenn verða að halda vöku sinni og kalla á endurmat við hverjar þær breyttu forsendur sem verða. Undanfarin ár hefur verið fólksfækkun í sveitarfélaginu. 1. desember 1998 voru íbúar 2.447, en 1. desember sl. 2.189 og hafði því fækkað um 258 manns á 7 árum. Þessi þróun er algjörlega óásættanleg. Fari íbúatalan niður fyrir 2.000 mun það hafa veruleg áhrif á framlög úr jöfnunarsjóði og þar með afkomu okkar, eins og reglur sjóðsins eru í dag. Þessi staða er mér mikið áhyggjuefni og ég tel að við þurfum að spýta í lófana og vera enn duglegri að sækja okkar mál.
Halldóra Bergljót Jónsdóttir, forseti bæjarstjórnar.
Skrifa athugasemd