Brian Griffin í Listasafni Hornafjarðar
Í dag opnar sýning á verkum Brian Griffin í Listasafni Hornafjarðar klukkan 15:00. Brian Griffin dvaldist á Hornafirði vorið 2007 ásamt eiginkonu sinni, Brynju Sverrisdóttur og tók myndir af Hornfirðingum og Hornfirsku landslagi.
Á sýningunni gefur að líta afrakstur heimsóknarinnar. Brian Griffin hefur starfað sem ljósmyndari um langt árabil og er þekktur ljósmyndari í heimalandi sínu, Bretlandi. Hann hefur haldið sýningar á verkum sínum víða um heim. Hornfirðingar ættu að þekkja ýmsa einstaklinga á myndunum auk þess sem áhugavert er að sjá umhverfi okkar eins og Brian sér það.



