Nýr forstöðumaður Menningarmiðstöðvar Hornafjarðar
Björg Erlingsdóttir hefur verið ráðin forstöðumaður Menningarmiðstöðvar Hornafjarðar. Því starfi gengdi áður Hjalti Þór Vignisson bæjarstjóri. Björg er fædd í Reykjavík 1970, uppalin á Akureyri en hefur búið í Reykjavík síðustu ár. Hún er með B.A-próf í þjóðfræði frá Háskóla Íslands, Cand.Mag. próf frá Háskólanum í Lundi, Svíþjóð auk þess sem hún lauk prófi í Safnafræði frá sama skóla. Eftir nám í Svíþjóð tók við vinna á Listasafni Reykjavíkur en með vinnu hefur hún stundað meistaranám í opinberri stjórnsýslu við Háskóla Íslands. Auk þess að vinna á Listasafni Reykjavíkur hefur hún unnið á sambýli fyrir fatlaða en hún hefur verið viðloðandi þann geira frá menntaskólaárunum á Akureyri.
Að sögn Bjargar eru mörg verkefni sem bíða enda starfsemi Menningarmiðstöðvar fjölbreytt og hún full tilhlökkunar að takast á við þau.
