Norræni skjaladagurinn 2009

Þema skjaladagsins í ár á Íslandi er „Konur og kvenfélög“

Opinber skjalasöfn á Norðurlöndum hafa lengi kynnt starfsemi sína með ýmsu móti. Frá 2001 hafa þau sameinast um árlegan kynningardag sem að þessu sinni er laugardagurinn 14. nóvember. Mörg skjalasöfn opna hús sín fyrir almenningi á þessum degi og vekja athygli á ákveðnum skjalaflokkum með sýningum á völdum skjölum. Eitt markmiða skjaladagsins er að efla vitund fólks um að skjalasöfn séu tryggir vörslustaðir skjala og er fólk hvatt til að hafa samband við starfsfólk skjalasafna ef það hefur undir höndum skjöl sem það veit ekki hvað á að gera við.

Þema skjaladagsins í ár á Íslandi er „Konur og kvenfélög“ en Félag héraðsskjalavarða ásamt Kvenfélagasambandi Íslands hefur staðið fyrir átaki á söfnun skjala kvenfélaga um land allt. Á vef skjaladagsins skjaladagur.is er sýnishorn af þeim skjölum sem kvenfélög víða um land hafa afhent á héraðsskjalasöfn auk ýmissa annarra skjala sem tengjast konum og hagsmunabaráttu þeirra.

Í tilefni dagsins verður skipulögð dagskrá á Þjóðskjalasafni Íslands og mörg hérðasskjalasafnanna verða einnig með opið hús þennan dag. Héraðsskjalasafnið á Hornafirði tekur þátt í norræna skjaladeginum með framlagi á vef skjaladagsins og þá verður opið hús á safninu milli 10:00 og 14:00 þar sem gerðabækur og skjöl kvenfélaga verða til sýnis og einnig nokkrar ljósmyndir. Tekið er á móti skjölum og myndum frá kvennasamtökum þennan dag eins og reyndar alla aðra daga.

Senda grein