Félagsmiðstöðin Miðgarður
Miðvikudaginn 2. september var Miðgarður opnaður. Þá var tilkynnt hverjir voru kosnir til Miðgarðsráðs. Sex aðilar eru í ráðinu, tveir úr hverjum árgangi, 8.-10. bekk. Hlutverk þeirra verður svo að vera tengiliðir síns árgangs ásamt því að skipuleggja viðburði og sjá um þá ásamt starfsfólki Miðgarðs. Þá er fundað vikulega auk þess sem ráðið fer í vinnuferð ásamt starfsmanni til að koma með hugmyndir fyrir starfið, sem verður svo unnið úr.
Í Miðgarðsráði eru:
Formaður: Lukka Óðinsdóttir (10.Á)
Varaformaður: Ingólfur Waage Jónsson (10.B)
Ritari: Anna Regína Heiðarsdóttir (9.Í)
Meðstjórnendur: Ingvi Þór Sigurðsson (9.A), Ljósbrá Dögg Ragnarsdóttir (8.G) og Ívar Örn Valgeirsson (8.G)
Fimmtudaginn 10. september var opnað fyrir 6. og 7. bekk og unglingunum gefinn kostur á að kynnast húsnæðinu, tækjunum og starfsfólkinu.
Síðastliðinn mánudag setti Miðgarðsráð saman dagskrá fyrir september og október. Hún inniheldur meðal annars: bíókvöld, Guitar Hero keppni, Miðgarðsquiz, kökukeppni, 80´s ball og strandbolta. Í lok september verður svo farið í vinnuferð þar sem endanleg dagskrá fram að jólum verður gerð.
Ýmsir klúbbar eru í bígerð, t.d. eftirfarandi:
Hobbýklúbbur: spennandi og skemmtilegur klúbbur þar sem allir ættu að geta fundið eitthvað við sitt hæfi. Þar verður fjölbreytnin í fyrirrúmi, m.a. margmiðlun, matseld, fjallgöngur, fiskveiðar. Svo verður endað á óvissuferð. Klúbburinn hefst þriðjudaginn 15. september og er til 17. nóvember.
Stílklúbbur: Undirbúningur fyrir Stíl 2009. Stíll er keppni á vegum Samfés sem gengur út á fatahönnun, förðun og hárgreiðslu. Fyrirhugað er að hafa hér undankeppni fyrir aðalkeppnina, og verður leiðbeinandi með hópnum.
Söngklúbbur: Söngkeppni Samfés er árlegur viðburður og er undankeppni fyrir hana á austurlandi (SamAust). Við leggjum metnað í að unglingarnir séu vel undirbúnir fyrir keppnina og því verður klúbbur þar sem unglingarnir geta fengið leiðbeiningu frá fagaðilum, svo verður haldin undankeppni í lokin en efstu tvö sætin fara svo í SamAust keppnina.
Opnunartími Miðgarðs er eftirfarandi:
8. - 10. bekkur
Mánudagar: 20:00 - 22:00
Þriðjudagar: í hádeginu
Miðvikudagar: 20:00 - 22:00
Fimmtudagar: í hádeginu
Föstudagar: í hádeginu og 20:00 - 23:00 (annan hvern föstudag)
6. - 7. bekkur
Miðvikudagar: 16:30 - 18:30
Einnig má geta þess að fyrirhugað er að opna Miðgarð fyrir ungmenni á aldrinum 16-25 ára. Miðgarður væri þeim afþreyingarstaður þar sem markmiðið er að bjóða ungu fólki upp á aðstöðu til skemmtunar og dægradvalar án vímuefna og tóbaks. Leitast verður við að ungmennin skipuleggi að mestu starfsemina og verði leiðandi í jákvæðu starfi ungs fólks.
Starfsemi í Miðgarði verður auglýst í skólum, á Facebook, á Skjávarpinu og svo er verið að vinna að heimasíðu þar sem verður hægt að fá ýmsar gagnlegar upplýsingar. Starfsmenn Miðgarðs eru Helga Rún Guðjónsdóttir og Brynjar Þór Pétursson.
