Paul Nedergaard, prófessor við Arkitektaháskólann í Árósum, heimsækir Höfn í dag og á morgun. Heimsókn hans er undirbúningur ferðar sem nemendur arkitektaskólans fara í á næsta ári en Nedegaard hefur komið árlega til Íslands undanfarin ár með nemendahópa, þeir mælt upp og teiknað gamlar kirkjur og önnur söguleg mannvirki. Prófessorinn hefur ákveðið að setja Hafnarvíkur-Heppu verkefnið á dagskrá arkitektaskólans á næsta ári, 2009 og stefnir að því að koma austur með hóp nemenda til uppmælinga og rannsókna það sumar. Arkitektadeild Listaháskóla Íslands verður einnig í samstarfi um þetta verkefni. Þessi heimsókn er mikilvægur liður í uppbyggingu hafnarsvæðisins og mikill fengur að fá Nedergaard og nemendur hans hingað. Lesa meira

Þá er barnastarfi Menningarmiðstöðvarinnar lokið í sumar, en það endaði með frábærri óvissuferð. Byrjað var á því að skoða kúabúið í Flatey, þar sem að Friðrik og félagar tóku á móti okkur og sýndu okkur hvernig fjós með sjálfvirku mjaltakerfi virka, en þar ganga kýrnar lausar á milli mjaltasvæðis, legusvæðis og átsvæðis. Eftir vel heppnaða heimsókn á kúabúið var svo farið í Eskey þar sem grillaðar voru pylsur og farið var í Kubb. Til þess að toppa svo ferðina fengu krakkarnir Jöklaís hjá Sigurlaugu og Jóni á Brunnhól. Lesa meira

Í þessari viku fór barnastarf menningarmiðstöðvarinnar í fjöruferð á Stokksnes þar sem gengið var á reka. Krakkarnir fundu ýmislegt í fjörunni og þar á meðal flotgalla. Nokkrar flöskur fundust en engin flöskuskeyti samt, einnig fannst rekaviður, steinar, skeljar, krabbar og bein. Rúsínan í pylsuendanum var svo allir selirnir sem að krakkarnir sáu, en það voru 6-8 selir sem lágu á skeri í fjörunni og nutu veðurblíðunnar. Lesa meira

Hornfirski listamaðurinn og kvikmyndagerðarneminn Hlynur Pálmason opnaði myndlistarsýningu á Höfn í Hornafirði 3-6 júlí. Sýningin hét "Sjónræn Dagbók" og samanstóð af ljósmyndum, málverkum og tveimur veggskúlptúrum úr tré og járni. Hlynur hélt svipaða sýningu fyrir ári síðan á sama stað í sýningarsal útfrá vinnustofu hans, í Graðaloftinu. Ljósmyndirnar á sýningunni voru svart-hvítar í ramma sem Hlynur smíðaði og málaði. Þær voru teknar á filmu og svo unnar á "gamla" mátann með sérstökum aðferðum í myrkraherberginu í stað þess að notast við myndvinnsluforrit. Þetta gerði Hlynur til þess að ná fram "málverkalegum" áhrifum eins og hann sjálfur greindi frá. Vinnslan skilaði sér með áhugaverðari myndum og gaf þeim gamaldags öðruvísi útlit í stað þess að vera "spegilsléttar" og fullkomnar eins og svo oft vill verða í nútímaljósmyndun fyrir tilstilli tölvutækninnar. Fyrir utan þá áhugaverðu hugmynd um að blanda saman málverki og ljósmynd þá er hægt að segja að efni myndanna eða frásögn hafi ekki haft neitt sérstakt þema. Margar sýndu fólk eða staði, þá helst að þær væru teknar á réttum augnablikum, uppfullar af áhugaverðum smáatriðum. Lesa meira

Fimmtudaginn 7. ágúst heldur barnakór úr Vesturheimi The New Iceland Youth Choir tónleika í Nýheimum. Tónleikarnir hefjast klukkan 20. Kórinn var stofnaður 1999 og er um mart sérstakur hópur. Kórmeðlimir eiga ættir að rekja til Hornafjarðar, Skagafjarðar og Borgarfjarðar Eystri og nokkrir eru afkomendur Gunnars Pálssonar, en Páll var sonur Þórðar (Blinda) Pálssonar og Halldóru Högnadóttur, frá Horni. Lesa meira

Í þessari viku fór barnastarf Menningarmiðstöðvarinnar í Steinaferð í Laxárdal í Nesjum. Krakkarnir fundu allskyns steinategundir eins og t.d. Glerhalla, Onyx, Jaspis og allskonar aðra fallega steina. Einn steinn stóð þó sérstaklega upp úr en það var grænleitur Jaspis sem að ungur drengur hér í sveit fann. Eftir vel heppnaða steinaleit var svo borðað nesti og haldið heim á leið. Þetta var mikil ævintýraferð fyrir krakkana en bíllinn festist í gljúpum árfarvegi Laxárinnar og var fengin hjálp til að losa bílinn á meðan krakkarnir fylgdust með og skemmtu sér konunglega. Lesa meira