Leikhópurinn Lopi er með jólasýningu í Mánagarði núna á aðventunni, leikritið heitir Jólagjafalistinn og er höfundur þess Magnús J. Magnússon, leikritið er einnig í leikstjórn hans. Sýningin fjallar um nokkra krakka sem ferðast um fjöllin í leit að vinum sínum. Fram koma í sýningunni ýmsar skemmtilegar persónur þar á meðal Grýla og Leppalúði , tröll, álfar og dvergar. Sýningin er klukkutíma löng og fyrir alla aldurshópa. Leikarar í sýningunni eru 19 og hefur verið unnið að þessu verkefni undanfarnar vikur. Þetta er 15. starfsár Leikhópsins og er þetta 20. frumsýningin sem hér fer á fjalirnar. Frumsýning er sunnudaginn 16. desember kl. 17.00 og er eins og áður er sagt í Mánagarði. Lesa meira

Í kvöld kl. 20 hefst upplestrardagskrá í Pakkhúsinu þar sem lesið verður úr glóðvolgum jólabókum. Dagskráin er haldin á vegum Listvinafélags Hornafjarðar. Gestalistinn hefur tekið smávægilegum breytingum þar sem skáldkonan Kristín Marja Baldursdóttir er lögst í jólaflensu og Þórunn Erlu- Valdimarsdóttir datt af hjólinu sínu og viðbeinsbrotnaði (rétt áður en hún var tilnefnd til íslensku bókmenntaverðlaunanna – fall er fararheill!) En margir góðir gestir eru væntanlegir: Sigmundur Ernir Rúnarson les upp úr ævisögunni Guðni – Af lífi og sál; Sigurður Hannesson les upp úr bók nafna síns Björnssonar frá Kvískerjum, Sótt fram; Halldóra Kristín Thoroddsen les upp úr skáldverki sínu Aukaverkanir; Bjarni Bjarnason les upp úr skáldsögu sinni Bernharður Núll; Hrund Þórisdóttir les upp úr verðlaunabarnabókinni Loforðið og Þorsteinn Geirsson les upp úr Gömlu hugljúfu sveit. Lesa meira

Hinn árlegi jólabókaupplestur verður í Pakkhúsinu á fimmtudagskvöld kl. 20. Þar les Hrund Þórsdóttir úr bók sinni Loforðið sem er barnabók og var valin besta sagan í samkeppni um íslensku barnabókaverðlaunin 2007. Kristín Marja Baldursdóttir les úr bók sinni Óreiða á striga en það er sjálfstætt framhald af bók hennar Karitas án titils frá árinu 2004. Sigurður Pálsson les úr bók sinni Minnisbók þar sem hann segir frá námsárum sínum í Frakklandi á árunum 1967-1982 og Þorsteinn Geirsson les úr nýrri bók sinni Gamla hugljúfa sveit. Sigurður Hannesson les valda kafla úr nýútkominni bók Sigurðar Björnssonar á Kvískerjum, Sótt fram. Þá ætlar Soffía Auður Birgisdóttir að lesa úr nýútkomnum ljóðabókum nokkurra kvenna. Lesa meira

Nú um helgina var úthlutað styrkjum úr Þjóðhátíðarsjóði og Menningarmiðstöðin á Hornafirði og Háskólasetur á Höfn fegnu styrki til verkefna sem unnið er að. Menningarmiðstöðin fékk tvo styrki. Annar styrkurinn 600.000 kr. er til skráningar á verkum Svavars Guðnasonar. Vinna við skráninguna hófst vorið 2007 og á verkinu að ljúka í febrúar 2008. Þegar hafa um 500 verk verið skráð í gagnagrunn, ljósmynduð og mæld auk þess sem eigendasaga verkanna er skráð. Markmið slíkrar skráningar er að fá heildaryfirlit yfir verk Svavars sem eru fjölmörg og dreifð víða um heim. Verk hans teljast tvímælalaust eitt merkasta framlag íslensks listmálara til sameiginlegs menningararfs þjóðarinnar og heildarskráning verka hans grundvallaratriði og jafnframt frumforsenda fyrir varðveislu, rannsóknum og til skilnings á verkum hans. Skráningin kemur til með að styrkja stöðu Menningarmiðstöðvar Hornafjarðar – Listasafns sem sérsafns um líf og störf Svavars Guðnasonar. Lesa meira