Ólafur Elíasson píanóleikari heldur tónleika í Nýheimum
Píanóleikarinn Ólafur Elíasson heldur tónleika í Nýheimum þriðjudagskvöldið 4. júlí. Á efnisskránni eru verk eftir Schubert og Debussy ásamt 7 píanóetýðum eftir Chopin, Liszt, Moszkowski og Schriabin. Etýðurnar (æfingarnar) eru á meðal erfiðustu verka píanóbókmenntanna og eru sumar jafnframt þekktustu píanóverk sögunnar svo sem La Campanella eftir Liszt og Byltingaretýðan eftir Chopin. Á tónleikunum mun Ólafur fjalla um verkin á léttum nótum og er þetta frábært tækifæri fyrir áhugamenn um sígilda tónlist til að kynnast heimi píanótónlistar. Ólafur var nemandi Rögnvaldar Sigurjónssonar heitins en stundaði framhaldsnám fyrst í París hjá hinum heimsþekkta píanóleikara Vlado Perlemuter og síðar í Englandi, m.a. við konunglega tónlistarháskólann í London (Royal Academy of Music) þar sem hann lauk einleikaraprófi 1994.
Ólafur hefur haldið tónleika víða, bæði hérlendis og erlendis og leikið inn á nokkra geisladiska, meðal annars píanókonserta bæði eftir Bach og Mozart ásamt sinfóníuhljómsveitinni ,,London Chamber Group? og hafa þeir fengið frábæra dóma. Tónleikarnir í Nýheimum eru hluti af tónleikaferð Ólafs um Austurland en hann mun einnig halda tónleika á Djúpavogi, Fáskrúðsfirði, Eskifirði, Egilsstöðum og á Eiðum.
Ólafur hefur einnig leikið sem meðleikari með Sigurði Bragasyni baritón en þeir hafa haldið fjölda tónleika m.a. í sumum þekktustu tónleikahúsum heims svo sem Carnegie Hall í New York, Wigmore Hall í London og Kennedy Center í Washington.
Tónleikarnir í Nýheimum hefjast kl. 20:30 og er aðgangseyrir kr. 1000.
