Jól í Holtagerði

Jólagestur okkar 22. des. er Alma Þórisdóttir

Þegar ég var lítil þá þá var alltaf mikil tilhlökkun þegar aðventan byrjaði. Ég ólst upp í stórum systkinahóp og það var mikið brallað og alltaf svo mikið fjör hjá okkur. Það var aldrei skreytt fyrr en á Þorláksmessu og þá var tekið til hendinni og allir músastigarnir teknir upp og settir þvers og kruss um allt hús, jólatréið skreytt, mamma sauð hangikjötið og skötuna og húsið angaði af vel kæstri skötu. Það var engin skötuveisla nema skötulyktin væri það sterk að það reif í nefið þegar maður andaði henni að sér. Það var líka mikill erill á heimilinu, margir sem komu við og köstuðu á okkur jólakveðju og svo var það kókósbollu- kallinn sem við systkinin kölluðum hann en hann færði okkur troðfulla kassa af kókósbollum, krembrauðum, staurum og buffum.

Þegar líða fór á kvöldið þá var farið niður í bæ á Laugaveginn að versla restina af jólagjöfunum. Þar sem við vorum svo mörg þá var farið margar ferðir svo allir gætu notið stemningarinnar niðrí bæ. Það var yfirleitt alltaf farið í bókabúð því það voru enginn jól án bóka á mínu heimilli og mikið lesið.

Það var alltaf svo mikil stemning á Laugaveginum og mikið af lifandi tónlist og allskonar uppákomum. Það er mér líka minnistætt þegar fór að líða á kvöldið og margir heimilisfeður voru komnir vel í glas og fóru að velja jólagjöf fyrir frúnna eða bara fjölskylduna - þá var ekkert til sparað og þeir ekkert nískir á budduna.

Á aðfangadag byrjaði mamma að sjóða rauðkálið og svo fórum við að týnast í bað eitt og eitt í einu og þurfti yfirleitt að reka á eftir okkur því allur krakkahópurinn þurfti að þrífa sig fyrir jólin. Það var líka hefð að fara í kirkju og var því aldrei borðað fyrr en kl. átta á aðfangadagskvöld. Voru þá flestir orðnir mjög svangir.

Það var alltaf farið í heitt kakó og kökur til systur mömmu sem bjó á efri hæðinni þegar búið var að opna pakkana. Á jóladag var mjög rólegt, en þegar líða fór á kvöldið þá var kominn mikil spilahugleiðing í okkur krakkana, en það mátti aldrei spila fyrr en eftir miðnætti á jóladag og þegar klukkan sló tólf þá var byrjað að spila og stóð það langt fram á nótt.

Ég held mjög hefðbundin jól í dag og er ekki með neina sérstaka hefð en ein jól eru mér mjög minnisstæð því þegar eldamennskan stóð sem hæst þá fór rafmagnið og það var ekkert nema myrkrið og þögnin sem umlukti okkur. Þegar við vorum búinn að jafna okkur þá fórum við að leita að kertum og eldspítum, við kveiktum á kertum um allt hús og þegar við litum út um gluggann þá var alveg svarta myrkur úti. Það kom ekki aftur á rafmagn fyrr en kl.19:30 um kvöldið en þá kláruðum við elda. Ég held bara að þetta hafi verið jólalegustu jólin mín hér á Hornafirði.

Að lokum fylgja hér tvær uppskriftir, ein af loftkökum sem voru mjög vinsælar þegar ég var að alast upp og svo ein uppskrift sem er eftir mig.

Loftkökur frá Bjarna bróðir.

Innihald
1 kg. Flórsykur
3 msk. Kakóduft
1 tsk. Hjartarsalt
3 stk. Egg
1 tsk. Vanilludropar

Aðferð
Hnoðið deigið og rennið í gegnum hakkavél,
hentar vel mót sem er rifflað að ofan en slétt að neðanverðu. Bakið í miðjum ofni við 200°C í ca. 10 – 12 mínútur.

Makkarónuréttur

Einn stór poki makkarónur
Ein stór dós Apríkósur
Einn pakki rommkúlur
½ líter rjómi

Aðferð

Myljið makkarónurnar í eldfast fat, brytjið niður apríkósurnar og setið yfir makkarónurnar, skerið niður rommkúlurnar og setið þær yfir, þeytið rjómann og dreifið honum yfir allt saman. Það má líka skreyta þetta með apríkósum og súkkulaðispæni.

Ég óska öllum gleðilegra jóla og farsældar á nýju ári.

Kveðja Alma Þórisdóttir.

Senda grein