Mamma hafi þó gert ráð fyrir einhverri rýrnun á kökulagernum
Jólagestur okkar 9. desember er Eiríkur Þorvaldsson
Ég held okkar jólahald hafi verið nákvæmlega eins og hjá flestum hér á norðurslóðum.þó man ég ekki eftir að vestfirski siðurinn með skøtuát á Þorláksmessu næði að ráði til Hornafjarðar meðan ég var þar. Á hinn veginn var norðlenska laufabrauðið byrjað að ná tökum á okkur. Fyrstu kynni mín af jólum var appelsínu og eplalyktin í húsinu,en það var bara á jólum að slíkar vörur voru á boðstólnum. Hreingerningabrjálæði gekk á í Nýjabæ eins og vera ber já og svo baksturinn af allskonar bakkelsi. Ég segi það sama sem einhver hér hefur skrifað, að kökur brögðuðust best ef þær voru stolnar. En mig hefur grunað að mamma hafi þó gert ráð fyrir einhverri rýrnun á kökulagernum. Verra var þó með kartöflubirgðirnar, en ég veit ekki hvort það uppgötvaðist nokkurn tíma hvað olli því að það tæmdist svo fljótt úr pokanum. En það var þannig að ég átti margar vinkonur í fjárhúsinu og þær að ógleymdum hrútunum, urðu náttúrlega að fá tilbreytingu á jólum.
Ljósaseríur þekktust ekki þá nema á jólatrjám en þó fóru að koma útiseríur, sem voru heimagerðar vanlegar perur sem voru málaðar í ýmsum litum. Kórónan í þeim málum varð þegar Unnsteinn frændi minn Guðmunds þúsund þjalasmiður fór til verka í þeim málum. Get þess til gamans að Öddi er einnig frændi minn svo þetta má liggja í genunum - meira um það seinna.
Á aðfangadagskvöld var lambslæri eða hryggur, hrísgrjónagrautur með rúsínum og heimagerður ís, og á jóladag var svo hangikjötið í heiðri haft. Þennan matseðil höfum við svo haldið fast við allar götur síðan nema að því undanteknu að rúsínugrauturinn varð að rísalamande.
Ástæðan fyrir því er sú að í upphafi okkar búskapar verð mér að orði að "þessi grautur er ekki eins góður og hjá mömmu" þessi orð hefðu betur verið ósögð því rúsínugraut hef ég ekki fengið síðan, --nema hjá mömmu.
Í Færeyjum er jólahald mjög líkt því íslenska, í stað hangikjötsins er svokallað ræst kjöt en það er sigið (kæst) lambakjöt sem er soðið eins og súpukjöt einnig með kjötsúpu.( Þetta sama kjöt kallast svo skerpikjöt þegar það hefur hangið og þornað nokkra mánuði í viðbót) Annars er hefðbundin jólamatur hér önd eða gæs og fleskasteik (svínakjöt) og risalamande í eftirrétt.. Hamborgarahryggur er hér ódýr dags daglegur matur,sem maður er löngu orðin leiður á.
En svo aftur til jólaljósanna. Færeyingar byrjuðu mun seinna en Íslendingar að skreyta með útiseríum. Ég var einn sá fyrsti hjér í Vestmanna sem byrjaði á þessu og það skeði eftir einn desembertúr til Íslands þar sem ég upplifði þessa nýju heillandi menningu. Keypti mér slatta af seríum með mér heim og setti upp. Húsið fékk fljótt nafnið Las Vegas. Eitt kvöldið er hringt til mín og sagt var að þetta væri frá flugvellinum. Hvort ég gæti verið svo vænn að hafa slökkt ljósin í hálfan tíma svo þeir næðu flugvélinni niður. Hætt væri við að flugmennirnir tækju feil af vellinum og húsunum hjá mér.Upp komst svo að þetta var einn vinur minn sem villti á sér heimildir. Síðan eru gengin nokkur ár og jólaseríumenningin er löngu komin til Færeyja og við bætist á hverju ári sem líður.
Hvað uppskriftir varðar er verri sagan. Konan segir að Íslenskar konur þurfi ekki uppskriftir því þær séu sjálfar sérfræðingar í bakstri því vísa ég til Júlíu Imsland með uppskriftir. Henni tekst vel til þegar hún bakar. (Ragnar-hættu þessu tauti. Ég skipti ekki ?þegar? út með ?þá sjaldan?).
Bestu jóla og nýársóskir.
Eiríkur Þorvaldsson (Færeyjum)
Hér kemur ein ekta jólaterta.
Konungsætt.
100 gr smjörl.
100 gr sykur
2 egg
100 gr hveiti
½ tesk lyftiduft.
Smjörl. linað og hrært með sykrinum, eggjum bætt í og síðan hveiti og lyftidufti. Bakað á plötu eða í rúllutertumóti við 200°.
Hvolft á sykri stráðan pappír og skorið í 7 ræmur fyrsta 2cm síðan stækkandi.
Smjörbráð.
¼ l mjólk
Vanilla
2 eggjarauður
40 gr sykur
30 gr hveiti
150 smjörl.
40 gr súkkulaði
Dálítið lagað kaffi.
Mjólkin og vanillan sett í pott og suðan látin koma upp. Eggjarauðurnar hrærðar vel með sykrinum og þegar mjólkin sýður er hveitinu hrært saman við eggin og því næst mjólkinni, sett í pottinn aftur og hrært vel í uns sýður. Hellt í skál og kælt. Súkkulaðið brætt yfir gufu og dálitlu kaffi hrært saman við. Látið standa í sama hita og eggjabráðin. Smjörl. hrært uns það er ljóst og mjúkt og síðan er eggjabráðinni hrært saman við það smátt og smátt. Ein matskeið af hrærunni tekin frá til skreytingar, því næst er súkkulaðinu blandað saman við bráðina. Breiðasta sneiðin sett á aflangt fat og smurð með smjörbráð og því næst er næst stærsta sneiðin sett ofaná og smurð o.sv frv þar til allar eru smurðar. Þá eru hliðarnar smurðar og síðast skreytt með kreminu sem tekið var frá .
Skrifa athugasemd