Skapti í Hraunkoti var jólasveinninn
Laufey Guðmundsdóttir er jólagestur á Hornafjörður.is
Það er nokkuð merkilegt að ætla að skrifa um jólin ,,í minningunni? en þegar litið er yfir farinn veg,með fullri virðingu fyrir þeim leiðum sem farnar hafa verið,, þá er ekki svo erfitt að finna eftirminnilegustu jólin að skrifa um. Mín besta minning frá jólum er úr bernskunni að Stafafelli í Lóni þar sem ég er fædd og uppalin að hluta. Undirbúningur jólanna var ekki mjög flókinn, farið var á Höfn í desember, ekki neinn sérstakur dagur notaður í það, bara sá sem hentaði í það og það skiptið. Þó var reynt að hafa ferðin fyrri hluta mánaðarins. Ferðalagið tók, í þá daga nokkrar klukkustundir, ekki var bifreiðin nein rosaleg spíttkerra, svo bættist við, holóttir vegir, kíkja fram af Skarðinu til að vita hvort einhver væri á móti, ef ekki, þá var lagt í fjallveginn rosalega. Fastir liðir í Hafnarferðinni voru að heimsækja móðursystur mínar og þeirra fjölskyldur,fara í Kaupfélagið, og svo það sem var mest spennandi ,að fara til Hrafnhildar og Agga.
Hrafnhildur og mamma þekktust auðvitað í gegnum símstöðina,mamma með símstöðina á Stafafelli og Hrafnhildur á stöðinni á Höfn. Hrafnhildur hafði þann dularfulla sið að hafa tíma fyrir orkufulla krakka og veitti okkur alla þá athygli sem við þurftum,sem var sennilega ekki svo lítil. Alltaf vorum við leist út frá Hrafnhildi með risastórann súkkulaðikúlupoka,sælgæti var ekki til í okkar orðabók. Bismark brjóstsykur og súkkulaðikúlur var það eina sem við þekktum af því tagi, Bismark bara af því að afi (Sigurður á Stafafelli ) gaf okkur alltaf Bismark á afmælisdaginn sinn. Þegar líða fór á desember kom pakkabíllinn með eplin og appelsínurnar , kassa af hvoru , þá var nú gaman að lifa, fá að horfa, fá að koma við og svo loks, að fá að bragða á dýrðinni, það er alveg ógleymanleg.
,,undarlegt hvað bragðgæðum epla og appelsína hefur farið aftur í tímans rás.?
Mamma saumaði jólafötin á allt liðið, 8 krakka takk, (þá vorum við bara átta ) 6 stelpur og 2 stráka, 6 kjóla, takk sælir, 2 jakkaföt kærar þakkir,, eins og mamma hafi verið algerlega atvinnulaus með allt þetta heimili og þó nokkuð bú að auki "svona í hjáverkum."
Jólatréð var hefðbundið spýtutré skreytt með sortulyngi, sem Friðrik í Hraunkoti kom með eftir sína hefðbundnu ferð inn í fjöll fyrir jólin, jólapokum úr glanspappír, og loks litlum hvítum kertum á greinunum, það var mjög hátíðleg stund þegar sest var að borðum, það logaði á trénu, messan ómaði í útvarpinu og allir krakkarnir algjörlega listarlausir af spenningi út af pökkunum sem biðu. Ég man sérstaklega eftir dúkkuhaus sem ég fékk í jólagjöf, en mamma hafði saumað kjól á hausinn svo ég gat stjórnað dúkkunni að vild, kannski var það upphafið af þeirri stjórnsemi sem í mér býr í dag ,,rétt að kenna foreldrunum um allt það sem ekki telst í lagi í fari manns".
Jólamaturinn var hrísgrjónagrautur í forrétt, hreindýrakjöt, stundum svínakjöt,alltaf eftirréttur sem hefur ekki nafn ,,bara gleypa í sig í hvelli til að komast í pakkana.. loks er komin ró á liðið og farið að skoða slites myndir frá allskonar uppákomum síðast liðins árs svo og gamlar myndir sem hafa valdið mikilli kátínu í gegnum tíðina.
Jólaböll var alltaf haldi í Fundarhúsinu, sem var líka skólinn okkar, Skapti í Hraunkoti var jólasveinninn, við vorum ekki svo fá börnin í sveitinni ca 46 stk ,,á þeim tíma.Öll vorum jafn spennt fyrir eplalyktinni sem fylgdi jólasveininum. Svona er nú minningin falleg. Það er af sem áður var, sveitirnar voru fullar af fólki, og hægt að halda skemmtanir á heimsmælikvarða.
Uppskrift af uppáhaldstertunni minni.
200gr sykur
60 gr hveiti
125gr rúgbrauð, raspað
1,5 tsk lyftiduft
1 msk kartöflumjöl
4 egg
200 gr smjörlíki
Aðferð:
Egg og sykur þeytt vel , og restinni blandað saman við og bakað í tveimur 20 cm formum í ca 30 mínútur við 180 gráður
Fylling:
Kokteilávextir (á milli botna)
Skreyting:
Skreytt með kokteilávöxtum og rjóma. Eftir smekk!!
Í lokin vil ég óska öllum Hornfirðingum Gleðilegra jóla og farsældar á komandi ári.
Jólakveðja frá Lækjarhúsum Suðursveit.
Skrifa athugasemd