Heilbrigðisstofnanir

Í lögum um heilbrigðisþjónustu nr. 40/2007 er kveðið á um grunnskipulag heilbrigðisþjónustu á Íslandi og skiptingu landsins heilbrigðisumdæmi sem nánar er kveðið á um í reglugerð nr. 785/2007 um heilbrigðisumdæmi, með (1.) breytingu nr. 765/2008 og (2.) breytingu nr. 1084/2008.

Í lögum um heilbrigðisþjónustu er áhersla lögð á að tryggja gæði heilbrigðisþjónustu og eftirlit með henni. Einnig er lögð áhersla á að almenn heilbrigðisþjónusta sé veitt í heimabyggð og að heilsugæslan sé að jafnaði fyrsti viðkomustaður sjúklinga. Þrátt fyrir skiptingu landsins í heilbrigðisumdæmi skulu sjúklingar „jafnan eiga rétt á að leita til þeirrar heilsugæslustöðvar eða heilbrigðisstofnunar sem þeir eiga auðveldast með að ná til hverju sinni“.

Heilbrigðisstofnanir sem veita almenna heilbrigðisþjónustu í hverju umdæmi eiga skv. lögunum að hafa með sér samstarf um skipulag heilbrigðisþjónustu á viðkomandi svæði og skal í hverju heilbrigðisumdæmi starfrækt heilbrigðisstofnun eða heilbrigðisstofnanir.

Umdæmissjúkrahús skulu veita almenna sjúkrahúsþjónustu, m.a. á göngu- og dagdeildum eftir því sem við á. Í tengslum við þau skulu vera hjúkrunarrými og fæðingarhjálp að uppfylltum faglegum kröfum og önnur heilbrigðisþjónusta sem sjúkrahúsinu er falið að veita eða samið hefur verið um. Á heilbrigðisstofnunum sem veita bæði almenna sjúkrahúsþjónustu og heilsugæsluþjónustu skal starfsemi samtvinnuð og starfsmenn ráðnir til að sinna báðum þáttum eftir því sem við á.

Sérhæfð heilbrigðisþjónusta er veitt á Landspítala, Sjúkrahúsinu á Akureyri, sérhæfðum heilbrigðisstofnunum og öðrum heilbrigðisstofnunum.

Landspítali er aðalsjúkrahús landsins og háskólasjúkrahús og Sjúkrahúsið á Akureyri er kennslusjúkrahús og sérhæft sjúkrahús.