Lesblinda - hvað er hægt að gera?
Á Menntavísindasviði Háskóla Íslands er sífellt unnið að rannsóknum á námi og kennslu. Nú hefur starfsfólk þar kynnt sér nýjar aðferðir við inngrip við lestrarvandamálum og á morgunvaktinni á Rás 1, 8. desember var viðtal við Steinunni Torfadóttur þar sem hún sagði frá því í hverju þessi inngrip felast.
Fyrst og fremst talaði Steinunn um snemmtæka íhlutun varðandi lestrarvanda. Snemmtæk íhlutun miðar að því grípa það snemma inn í málþróun barnsins að lestrarvandinn komi helst aldrei upp og trufli barnið a.m.k. lítið í námi. Lestrarvanda skiptir Steinunn í tvennt, annarsvegar lesblindu og hinsvegar lesskilningsvanda.
Lesblinda ? tengist erfiðleikum í hljóðkerfisvitundinni og til að vera með fyrirbyggjandi vinnu gegn lesblindu er mikilvægt að vinna með tengsl hljóða og orða, hljóða og stafa. Þetta getum við gert í allskonar orðaleikjum, s.s. hvaða hljóð er fyrst í orðinu mús og svo framvegis.
Lesskilningsvandi tengist meira erfiðleikum í málþroska. Lesskilningur byggir að miklu leyti á góðum málskilningi og það að lesa fyrir börn og tala við þau örvar mjög málskilning og dregur úr líkum á lesskilningsvanda.
Mikilvægt er að foreldrar og aðrir uppalendur geri sér grein fyrir því að öll vinna með málið er mikilvæg alvega frá fæðingu og eftir því sem fyrr er gripið inn í vandamál þeim mun minni eru líkurnar á vandamálum.
Næsta haust stefna Grunnskólinn og leikskólarnir hér á Höfn að því að fá Steinunni á sameiginlegt námskeið þar sem viðfangsefnið er snemmtæk íhlutun á lestrarvanda. Hér er hægt að nálgast viðtalið við Steinunni í heild sinni.
