Opin vika í FAS að bresta á
Í næstu viku stendur mikið til í FAS en þá er hin árlega opna vika á dagskrá. Hefðbundið skólastarf er þá brotið upp og starfa nemendur þá í hópum eftir sínu áhugasviði.
Sex hópar munu starfa í vikunni en þeir eru; fjölmiðlahópur, íþróttahópur, kvikmyndahópur, ljósmyndahópur, útivistarhópur og árshátíðarhópur. Fyrirhuguð verkefni eru af ólíkum toga en til dæmis á að gefa út skólablað, búa til stuttmyndir, halda ljósmyndasýningu og íþróttamót, fara í fjallgöngu og að sjálfsögðu skipuleggja árshátíð skólans sem haldin verður á föstudagskvöldið 15. febrúar í Sindrabæ.
Fyrir utan að starfa í hópum munu nemendur tvisvar taka þátt í sameiginlegri dagskrá. Eftir hádegi á mánudag verður spilaður Hornafjarðarmanni undir leiðsögn útbreiðslustjórans Alberts Eymundssonar og eftir hádegi á miðvikudag verður nemendum skipt í hópa og taka þeir þátt í ýmsum hópeflisleikjum. Til að spilla ekki spennunni fyrir þessum leikjum verður ekki fjallað um þá nánar hér.
Það verður örugglega mikið fjör og mikið gaman í næstu viku og nóg um að vera í FAS eins og alltaf.
www.fas.is
Skrifa athugasemd