Jólagestur - Mahder Zewadu
Mahder kom Íslands árið 2005 frá Eþjópíu til að starfa sem au-pair í eitt ár og skoða sig um í heiminum. Þess má geta að samkvæmt hennar tímatali kom hún til landsins árið 1998. Senn lýkur árinu 2005 í Eþíópíu en það gerist nánar tiltekið átta dögum eftir að árið 2013 gengur í garð á Íslandi.
Hún var staðráðin í því að snúa aftur heim en þá hafði hún kynnst eiginmanni sínum honum Guðmundi Annel Ragnarssyni svo þar gripu örlögin í taumana. Mahder hefur búið hér á Höfn síðan 2007 og eiga þau hjónin tvö börn þau Fanney Rut og Matthías og reka fyrirtækið sitt Trölla með glæsibrag.
Mahder ólst upp í höfuðborg landsins Addis Ababa en í henni búa um 5 milljónir manns. Borgin er fjölmenningarleg, um 80 tungumál eru töluð í borginni sem tilheyra ólíkum trúarlegum samfélögum. Stærstur hluti þjóðarinnar tilheyrir Orthodox kirkjunni. Um 60% þjóðarinnar eru kristnir Orthodox og kaþólskir en Mahder tilheyrir því sem við á Íslandi köllum Hvítasunnusöfnuð. Aftur á móti eru 30% þjóðarinnar Múslima trúar svo innan landsins má finna margvíslegar hefðir og venjur.
Páskarnir eru mesta trúarhátíð stærsta hluta þjóðarinnar. Fyrir páska er fastað er í fjörutíu daga en fastan byggist á því að kjöt og mjólkurvörur eru teknar af matseðlinum.
Hátíðarhöldin hefjast föstudaginn langa, þá eru gefnar gjafir, þess minnst að Jesú gaf líf sitt á krossinum og trúin iðkuð og börnin frædd um inntak páskahátíðarinnar. Laugardagurinn fyrir páska fer í að undirbúa páskamáltíðna og um kvöldið er haldið til kirkju og þar dvalið um nóttina, fólk biður, það er leikhús fyrir börnin og fólk leggur sig ef það vill. Klukkan þrjú um nóttina hringja allar kirkjuklukkur og farið er með logandi kerti til að minnast upprisunnar. Þá verða formleg endalok föstunnar og því er algengt að allir, líka þeir sem ekki fara til kirkju vakni til að rjúfa föstuna.
Jóladagur er eini dagurinn sem telst hátíðisdagur og því er ekki jólafrí í skólum eins og tíðkast hér á landi. Í Eþíópíu hefur ekki tíðkast að setja upp skreytingar þó svo eitthvað hafi færst í vöxt að hefðir frá Evrópu og Ameríku hafi borist til landsins. Á aðfangadag kemur fjölskyldan saman og eldar mat, því langan tíma tekur að útbúa mat með Eþíópískum hætti.
Að morgni jóladags er venjan sú að klæðast þjóðbúningum, yfirleitt er gengið til kirkju og dvalið þar um langa stund, trúin meðtekin og þakkað fyrir fæðingu frelsarans. Að því loknu er farið heim og fjölskyldan borðar saman, spjallar og nýtur samvistanna. Þar með er formlegu jólahaldi lokið. Karlmenn á öllum aldri fara og leika krikket enda sólskin og bjart á þessum árstíma. Ekki tíðkast að að gefa gjafir á jólum og jólasveinninn lætur ekki sjá sig þar um slóðir. Mahder hefur frætt börnin sín muninn á íslenskum og eþíópískum jólahefðum og þakkaði Fanney Rut dóttir hennar mikið fyrir að þeir sveinar ættu leið framhjá hér á Íslandi. Vegna annars tímatals hafa Mahder og hennar fjölskylda kost á að halda upp á jólin á báðum stöðum á réttum degi fyrst hér á Íslandi og átta dögum síðar Eþíópíu.
Hér á Íslandi heldur Mahder dæmigerð íslensk jól með öllu tilheyrandi. Fjölskyldan hittist, það er skreytt, bakað og borðaður hátíðarmatur. Þar sem jólin eru mun minni í sniðum í Eþíópíu verða íslenskir siðir ofaná. Mahder saknar þó alltaf fjölskyldu sinnar í Eþíópíu á hátíðarstundum því þar heldur stórfjölskyldan mun meira saman en á Íslandi. Mahder segist þó vera einstaklega heppin að Guðmundur, maðurinn hennar, eigi systkini á Hornafirði og þau hafi skapað sér jólasiði sem byggjast á því að koma saman.
Magnhildur Gísladóttir
BB
Skrifa athugasemd