Vilja millilandaflug frá Hornafirði
Fjórir þingmenn hafa lagt fram tillögu til þingsályktunar um að innanríkisráðherra verði falið að „tryggja að á Hornafjarðarflugvelli verði nægjanlegur búnaður og aðstaða til að hægt sé að sinna þaðan millilandaflugi með minni farþegaflugvélum og vélum í ferjuflugi sem núna hafa heimild til þess að fljúga um völlinn,“ eins og segir í henni.
Flutningsmaður er Unnur Brá Konráðsdóttir, þingmaður Sjálfstæðisflokksins, en meðflutningsmenn eru Sigurður Ingi Jóhannsson, þingmaður Framsóknarflokksins, Ragnheiður Elín Árnadóttir, þingmaður Sjálfstæðisflokksins, og Atli Gíslason sem situr utan flokka. Öll eru þau þingmenn Suðurkjördæmis.
„Hornafjarðarflugvöllur gegnir mikilvægu hlutverki í samgöngukerfi landsins. Mikilvægt er að tryggja áframhaldandi rekstur og uppbyggingu á svæðinu til hagsbóta fyrir heimamenn og atvinnulífið. Ljóst er að staðsetning vallarins býður upp á mikla möguleika til aukinnar umferðar ferðamanna, sérstaklega í kjölfar tilkomu Vatnajökulsþjóðgarðs,“ segir í greinargerð með tillögunni.
Þingsályktunartillagan í heild
Frétt mbl.is
Skrifa athugasemd