Fjallamennskunemar FAS í grasaferð
Á fimmtudag, föstudag og laugardag í síðustu viku, sátu fjallamennskunemar grasa- og dýrafræðihluta áfangans: Náttúrufræði fjalla og óbyggða.
Þar fór Skarphéðinn Þórisson líffræðingur yfir helstu háplöntur til fjalla og einnig helstu fugla og villt spendýr sem finnast á fjöllum. Eftir hádegi á laugardag fór svo hluti hópsins í skoðunarferð til að skoða gróður í fjallendi. Farið var á bílum langleiðina upp veginn upp að Jöklaseli sem liggur neðan til yfir Borgarhafnarheiði. Stoppað var á nokkrum stöðum, gengið um og gróðurinn skoðaður. Allar háplöntur sem fundust voru skrifaðar niður og stendur til að skrá þær, sem ekki hafa fundist á þessu svæði áður, í Plöntuvefsjá Náttúrufræðistofnunar Íslands (http://vefsja.ni.is/website/plontuvefsja/).
Nemendur voru ánægðir með ferðina og sögðu hana hafa verið mjög gagnlega, enda er skemmtilegt að kunna skil á helstu plöntum sem menn rekast á ferðum sínum um fjöll.
Skrifa athugasemd