Drekinn kominn í Klaustur
Félagarnir Gunnar Sigurjónsson og Ármann Guðmundsson í Björgunarsveitinni Kára í Öræfum eru komnir með Drekann (10 tonna trukk björgunarsveitarinnar) vestur í Kirkjubæjarklaustur og eru til taks ef sækja þarf fólk í bíla sem ekki komast áfram vegna öskufalls eða annars sem uppá kann að koma á hættusvæðinu. Þegar fréttamaður vefsins hafði samband við Gunnar um kl.17 sagði hann að betur liti nú út með veður, það er bjartara yfir og smá rigning. Núna er ekki öskufall í Álftaveri en þar var svo dimmt að nánast sást ekkert á nokkuð breiðu svæði en náði þó ekki til allra bæja þar.
Það er mikið öryggi að hafa Drekann á svæðinu því hægt er að komast á honum nánast við hvaða veðuraðstæður sem er. Hægt er að hafa meiri þrýsting inni í honum og taka síað loft inn þannig að gosefni eða eiturefni komast ekki inn. Í kvöld verður ákveðið hvort Gunnar og Ármann verða á Klaustri eða skilja Drekann eftir þar og fara heim tilbúnir að koma aftur efþörf er á.
Drekinn hefur oft komið í góðar þarfir í Öræfasveit þegar flytja hefur þurft fólk milli staða í sveitinni þegar öðrum farartækjum hefur ekki verið fært vegna ofsaveðurs og Gunnar segir það liðna tíð að skólabörn komist ekki til og frá skóla þegar vindurinn mælist nokkra tugi metra þá er drekinn tækið sem dugir.
Skrifa athugasemd