Virkjanakostir og nýting jarðefna í sveitarfélaginu
Að frumkvæði atvinnumálanefndar Hornafjarðar hefur verið ákveðið að ráðast í verkefni sem hefur að markmiði að skoða virkjanakosti í héraðinu og frekari nýtingu jarðefna. Verkefnið er nokkuð nýstárlegt á Íslandi og hefur Nýsköpunarmiðstöð Íslands samþykkt að taka þátt í verkefninu. Sérstaklega verða skoðaðir möguleikar á virkjun sjávarorku, vindorku og notkunar á nýrri tækni við virkjun vatnsafls. Einnig verður skoðað hvaða möguleikar felast í nýtingu jarðefna í sveitafélaginu. Svæðið er stórt og býr yfir miklum fjölbreytileika í jarðfræðilegum skilningi. Teknar verða saman upplýsingar um nýtingu íss, vatns, grjóts, sands og annarra jarðefna í heiminum og settar fram tillögur um hugsanlega nýtingu þeirra í Sveitarfélaginu Hornafirði.
Gert er ráð fyrir að fyrst um sinn sé um grunnrannsókn á hagkvæmni að ræða sem mun taka um eitt ár. Að þeim tíma liðnum verður tekin ákvörðun um hvort einstakar hugmyndir í verkefninu verði skoðaðar betur og hvernig koma mætti upp atvinnustarfsemi í framhaldinu.
Verkefnið verður unnið á Hornafirði á vegum Frumkvöðlasetursins í Nýheimum með stuðningi frá Nýsköpunarmiðstöð Íslands í Reykjavík. Stefnt er að því að ná samstarfi við aðila í Skotlandi sem hafa náð góðum árangri í virkjun vind- og sjávarorku. Verkefnið er fjármagnað af Sveitarfélaginu Hornafirði.
Skrifa athugasemd