Uppskeruhátíð bænda í Austur-Skaftafellssýslu verður haldinn laugardaginn 1. nóvember n.k. á Smyrlabjörgum og er þetta í áttunda skiptið sem hún er haldin, en hún var fyrst haldin árið 2001 í tilefni að 50 ára afmæli Búnaðarsambands Austur-Skaftfellinga. Búnaðarsambandið hefur staðið fyrir þessari hátíð og síðustu ár í samvinnu við Ferðaþjónustunna á Smyrlabjörgum. Dagskráin verður með hefðbundnu sniði, húsið verður opnað kl 19:30 og hefst borðhald kl 20:30. Veittar verða viðurkenningar fyrir góðan árangur í helstu landbúnaðargreinum. Veislustjórn að þessu sinni verður í höndum Kristínar Laufeyjar Jónsdóttur á Hlíð og mun hljómsveitin Næturvaktin spila fyrir dansi. Lesa meira

Nú er farið af stað nýtt verkefni á vegum Þjóðleikhússins og gengur það verkefni undir nafninu Þjóðleikur. Þetta er leiklistarhátíð fyrir ungt fólk á Austurlandi á aldrinum 13 - 20 ára. Nú þegar hafa þrettán hópar skráð sig í verkefnið og koma þeir bæði úr grunnskólum og framhaldsskólum. Þrjú leikverk hafa verið skrifuð sérstaklega fyrir Þjóðleik. Það eru: Ísvélin eftir Bjarna Jónsson, Eftir lífið sem er eftir Sigrygg Magnason og Dúkkulísa eftir Þórdísi Elvu Þorvaldsdóttur Bachmann. Lesa meira

Það var ekkert sem minnti á kreppu hér á Hornafirði í dag allt á fullu við höfnina og veðrið eins og best er á kosið á þessum árstíma , logn og hiti rétt yfir frostmarkinu. Hér er nóg að gera í síldinni hjá Skinney Þinganesi , Birtingur landaði í dag um 500 t. og er farinn aftur til veiða og Ásgrímur Halldórsson kemur í nótt með um 1000 t. Jóna Eðvalds heldur á síldveiðar í dag. Lesa meira

Þriðjudaginn 21 október var haldin óhefðbundinn foreldrafundur á Lönguhólum. Byrjað var á að hittast í sal skólans þar sem kosið var í foreldraráð, síðan var stutt kynning á uppbyggingarstefnunni og að lokum var farið með foreldrum í útiskólann, farið var á öll svæði og foreldrar unnu verkefni í hinum ýmsu námssviðum sem unnið er með auk þess sem allir fengu hressingu eins og tíðkast. Foreldrum gafst góður tími til að ræða við starfsfólk og spyrja um störf skólans. Þeir foreldrar sem eiga börn í yngstu árgöngum skólans fóru ekki í útiskóla en fengu kynningu á því hvernig undirbúa á yngstu nemendur undir það sem koma skal í útivinnu. Lesa meira

Slökkvilið Hornafjarðar var kallað út kl 22.00 í gærkvöldi vegna elds í svíða- skúr sláturhúss Norðlenska á Höfn. Þegar slökkviliðið kom á staðinn var lítill eldur í skúrnum sem greiðlega gekk að slökkva. Einhverjar skemmdir urðu á þaki skúrsins. Steinþór Hafsteinsson slökkviliðsstjóri sagði að þar sem mikið væri af gas og súr í kring um svona starfsemi og þar af leiðandi mikil sprengihætta hefði allir bílar slökkviliðsins komið á staðinn. Lesa meira

Dagana 20.-24. október n.k. verður haldin fjölþjóðleg ráðstefna um þróun umhverfismenntar og fræðandi ferðaþjónustu á friðlýstum svæðum. Ráðstefnan er á vegum NEED-verkefnisins "Northern Environmental Education Development project" sem hlaut nýverið þriggja ára styrk frá Norðurslóðaáætlun Evrópusambandsins (Northern Periphery Programme). NEED er samstarfsverkefni Finna, Íslendinga, Norðmanna og Íra. Fræðasetur Háskóla Íslands á Hornafirði leiðir íslenska hluta verkefnisins en aðrir aðstandendur þess hérlendis eru Þekkingarsetur Þingeyinga, Þekkingarnet Austurlands, Framhaldsskóli Austur Skaftafellssýslu og Kirkjubæjarstofa. Lesa meira

Góðri og skemmtilegri sumardagskrá er lokið hjá ferðafélaginu. Farið var í 14 ferðir, tveimur ferðum þurfti að fresta vegna veðurs. Annars voru veðurguðirnir okkur hliðhollir. Mæting var góð en um 330 manns nýttu sér að ferðast með okkur. Ferðanefndin þakkar öllum þeim sem hafa verið með okkur í sumar, veitt okkur leiðsögn og leyfi og gert ferðir okkar skemmtilegar og áhugaverðar. Við hlökkum til að hitta sem flesta í vetrardagskránni sem er nýjung. Það er strandganga, ganga á frá Horni að Hornafjarðarfljótum. Frekari upplýsingar má finna á heimsíðu okkar gonguferdir.is. Lesa meira

Þekkingarnet Austurlands í samvinnu við framhaldsskóla og fyrirtæki á Austurlandi, Fræðslumiðstöð atvinnulífsins, Fræðslusetur iðnaðarins (Iðuna) og Nýsköpunarmiðstöð Íslands fer af stað með verkefni um RAUNFÆRNIMAT á allra næstu dögum. Fyrsta kastið verður unnið að raunfærnimati í vélvirkjun en seinna í rafvirkjun. Til að eiga kost á að taka þátt í raufærnimati þurfa menn að hafa starfað í greininni í um 5 ár samanlagt. Kynningarfundur verður haldinn í fjarfundi í námsveri ÞNA í Nýheimum þriðjudaginn 21. október kl. 20:00. Lesa meira

Síldveiðiskipið Ásgrímur Halldórsson landaði í fyrranótt 900 tonnum af góðri síld hjá Skinney Þinganesi. Síldin veiddist vestur í Hvammsfirði og mun skipið halda aftur á miðin þar í dag. Birtingur(áður Áskell) er á leiðinni til Hafnar með 750 tonn af síld. Þriðja síldveiðiskipið hjá Skinney Þinganesi, Jóna Eðvalds, leggur af stað heim frá Póllandi í dag en þar hefur verið unnið að breytingum og endurbótum á skipinu og mun skipið fara á síldveiðar.

Fyrir nokkrum dögum landaði Ásgrímur Halldórsson 540 tonnum af síld sem hann fékk í Breiðamerkurdýpi í tveim veiðiferðum.

Lesa meira

Brautskráning nemenda úr ferðamáladeild og fiskeldis- og fiskalíffræðideild Hólaskóla - Háskólans á Hólum fór fram í Hóladómkirkju laugardaginn 11. október. Samtals útskrifuðust 16 nemendur með eftirfarandi gráður: diplóma í fiskeldisfræði (5), staðarvörður (1), viðburðarstjórnun (2), diplóma í ferðamálafræði (6) og BA í ferðamálafræði (2). Skúli Skúlason rektor flutti hátíðarræðu, deildarstjórarnir Guðrún Þóra Gunnarsdóttir og Helgi Thorarensen brautskráðu og ávörpuðu samkomuna. Sveinn Sigurbjörnsson og Thomas R. Higgerson léku á trompet og orgel. Málfríður Finnbogadóttir stjórnaði dagskránni. Að lokinni athöfn var gestum boðið í glæsilegt veislukaffi. Lesa meira

Þekkingarnetið, Nýsköpunarmiðstöðin og Framhaldsskólinn í Austur-Skaftafellssýslu stóðu sl.laugardag fyrir fræðslufundi í Nýheimum um lesblindu og þann góða árangur sem náðst hefur í baráttunni við þessari fötlun sem svo margir eru að glíma við, fólk á öllum aldri. Jón Sölvi Ólafsson ( í Kokkinum) einn þeirra sem þátt tók í fræðslufundinum þekkir vel þá erfiðleika sem lesblindir eiga við að etja og sagði hann að það að fá svona fræðslufund væri alveg nauðsynlegt og skipti öllu máli fyrir lesblinda og aðstandendur þeirra. Þetta var alveg magnað sagði Jón Sölvi, þetta er að auka blóðflæði bæði hjá sveitarfélaginu og mér sjálfum og þetta er það sem þurfti að koma. Lesa meira

Á bloggsíðu Hjalta Þórs Vignissonar bæjarstjóra ritar hann um það ástand sem nú er komið upp og segir þar m.a. að hann finni til með öllum þeim sem verða fyrir barðinu á þessum hremmingum og mikilvægt sé að við sýnum hvort öðru samstöðu, nærgætni og hlýhug í samskiptum okkar hvert við annað. Þrátt fyrir aðsteðjandi vanda, sem vissulega eru miklir, þá megum við ekki missa sjónar á því að við búum í góðu samfélagi sem við skulum sameinast um að varðveita. Lesa meira

N.k. laugardag, 11.okt. kl. 10 -16, stendur Þekkingarnetið, í samvinnu við Nýsköpunarmiðstöð og Framhaldsskóla A-Skaft. fyrir fræðslu- og upplýsingadegi í þágu lesblindra í Nýheimum. Dagurinn er hugsaður fyrir allt áhugafólk en sérstaklega fyrir fullorðið fólk með lesblindu og foreldra lesblindra barna. Rannsóknir hafa leitt í ljós að um 10-14% af hverjum árgangi eigi við einhverjar afleiðingar lesblindu að stríða en 2-4% séu með alvarlega lesblindu. Lesblinda stafar af röskun á úrvinnslu stafa og hljóða í málsvæði heilans og hindrar á ýmsan hátt að fólk geti lesið eða skrifað reiprennandi. Lesblindir eiga því erfitt með að ná upplýsingum og þekkingu út úr rituðu máli. Með auknum rannsóknum á orsökum lesblindu hafa verið þróaðar fjörbreyttar aðferðir, tæknibúnaður og hjálpartæki sem minnka þá hindrun sem lesblindan er. Lesa meira

Stígamót eru samtök sem berjast gegn kynferðislegu ofbeldi og veita fólki aðstoð sem vilja vinna sig út úr afleiðingum eftir slíkt ofbeldi. Aðstandendur eru einnig velkomnir svo og fagfólk sem vantar upplýsingar eða stuðning. Fram að þessu hafa Stígamót að mestu leyti nýst höfuðborgarbúum þó það sé nokkuð öruggt að fólk á landsbyggðinni gæti notfært sér þjónustu okkar líka. Á síðasta ári fór Stígamótafólk hringferð um landið til að kynna þjónustuna og þá kom skýrt í ljós að mikill áhugi er víða til að hefja samstarf milli sveitafélaga og Stígamóta. Lesa meira

Sporthöllin verður opnuð á föstudaginn 10. okt. en þar hefur starfsemin legið niðri í sumar. Það hafa eflaust margir beðið þessa með óþreyju og óvissu um hvernig yrði með líkamsræktarmál Hafnarbúa. Sigrún Sveinbjörnsdóttir, í Heilsu og útliti, og Sandra Sigmundsdóttir kírópraktor hafa tekið við rekstri Sporthallarinnar og hafa fengið til liðs við sig góða kennara og þjálfara svo nú ætti líkamsrækt bæjarbúa að vera vel borgið. Sigrún segir að tækjakostur sé sá sami og verið hefur en reynt verði að auka fjölbreytni þess sem í boði er þannig að allir aldurshópar finni eitthvað við sitt hæfi. Lesa meira

Skinney-Þinganes hlaut í gærkvöldi íslensku sjávarútvegsverðlaunin 2008 fyrir framúrskarandi fiskvinnslu. Verðalaunaafhendingin fór fram í Turninum, Smáralind og eru veitt þeim sem þykja hafa skarað framúr í fiskveiðum og sjávarútvegi bæði á Íslandi og erlendis. Aðalsteinn Ingólfsson, framkvæmdastjóri veitti verðlaununum viðtöku. Lesa meira

Samkvæmt heimildum fréttavefsins er elsti íbúi Austur-Skaftafellssýslu Pálína Guðrún Gísladóttir frá Skálafelli sem nú er 96 ára. Pálína, eða Palla eins og hún er jafnan kölluð, hefur dvalið á Hjúkrunarheimilinu Skjólgarði í rúm tvö ár. Um helgina fékk hún góða heimsókn afkomenda sinna og voru þar m.a. saman komnir fimm ættliðir í kvenlegg sem eru:, dóttirin Ingunn, ömmubarnið Pálína Sigurrós, langömmubarnið Tinna Rut og langalangömmubarnið Birta Líf sem er aðeins 9 mánaða.Það leyndi sér ekki að það gladdi gömlu konuna mikið að fá þennan myndarlega og glaðlega hóp sem kom í heimsókn yfir helgina en þær eru allar búsettar á höfuðborgarsvæðinu Lesa meira

Hornfirðingar sýndu mátt sinn og megin með því að sigra Seltirninga með yfirburðum hægt og hljótt, einu sinni, einu sinni enn. Keppnin var mjög spennandi og héldu Hornfirðingar forustinni allan tímann. Bæði liðin stóðu sig mjög vel en Hornfirðingar felldu Seltirninga með 67 stigum en lið Seltirninga fékk 55 stig. Frjálsíþróttakonan og skólastjórinn Þórgunnur Torfadóttir sýndi hversu öflug hún er þegar grípa þurfti bjölluna. Auk hennar voru Sigurður Örn Hannesson skjalavörður og Kristín Hermannsdóttir veðurfræðingur í liði Hornfirðinga. Lesa meira

Það er töluverður kraftur í framkvæmdum við sundlaug núna, búið er að fylla í bílastæði fyrir framan sundlaugarbyggingu og einnig inni á sundlaugarsvæðinu. Það er stefna verktaka að gera klárt fyrir dúklagningu um miðjan október og í kjölfarið hefst vinna við uppsetningu þriggja rennibrauta sem eru á leiðinni til landsins. Verktakar vinna samhliða þessu hörðum höndum við að loka húsinu og eru þessa dagana að ganga frá gluggum og þakpappa. Gunnar Gunnlaugsson framkvæmdastjóri Mikaels ehf. segir uppsteypu við húsið vera að mestu lokið og því næst verði lögð áhersla á klæðningu utaná húsið og múrvinnu. Stefnt er á að helluleggja svæðið við laugina áður en hún verður dúkklædd innan. Lesa meira