Enginn barlómur í bændum hér í sveit
Miklar ræktunarframkvæmdir eru í Sveitarfélaginu Hornafirði og hugur í bændum að bæta við túnin og hreinsa uppúr skurðum á ræktunarlöndum, en það þarf að gera á nokkurra ára fresti. Þeir sem leið eiga á Hornafjarðarflugvöll sjá stóran og mikinn fráveituskurð sem Pétur Haukur Jónsson hefur verið að grafa fyrir túnrækt. Það er enginn barlómur í bændum hér þó móti blási í efnahagsmálum þjóðarinnar og miklar hækkanir á áburði og olíu segir Grétar Þorkelsson starfsmaður Búnaðarsambandsins, og menn eru ekkert á því að draga saman heldur hafa bú hér stækkað. Stærsta viðbótin í kúabúskapnum er nýja kúabúið í Flatey með á annað hundrað kýr og þar eru miklar ræktunarframkvæmdir í gangi.
Ræktunarframkvæmdir tilheyra ekki eingöngu bændum og á næstunni verður byrjað á að þurrka upp og endurbæta umhverfið við innkeyrsluna til Hafnar. Nýr skurður verður tekinn samhliða veginum frá pípuhliði að Brennuhól 25m. frá veginum og fyllt upp í skurðinn sem fyrir er. Skjólbelti kemur við skurðinn nær veginum ásamt göngu og hjólastíg og 20m. grænu svæði að veginum. Síðar verður farið í að þurrka upp svæðið innan við tjaldsvæðið og á fleiri stöðum í nágrenni bæjarins.
Heyskapur hefur gengið vel bæði hefur tíð verið hagstæð og grasspretta góð og sumir bændur eru að ljúka fyrri slætti.
Skrifa athugasemd