“Það er mikill metnaður og góður vilji stjórnvalda að standa vel að uppbyggingu Vatnajökulsþjóðgarðs”
Í kjölfar frétta undanfarið um ráðningu framkvæmdastjóra Vatnajökulsþjóðgarðs, auglýsingar eftir sumarstarfsfólki og svo ályktun bæjarráðs um staðsetningu framkvæmdastjórans hafði blaðamaður hjá hornafirði.is samband við nýskipaðan framkvæmdastjóra, Þórð H. Ólafsson, en þá var hann nýkominn af fundi í Ásbyrgi.
Hann var spurður um stöðu þjóðgarðsins núna og starfið framundan. Einnig var hann spurður um staðsetningu framkvæmdastjóra, hvort hann yrði með vinnuaðstöðu á fleiri en einum stað og hvað hann myndi vilja sjálfur.
Hér á eftir birtist viðtalið í heild sinni.
"Vatnajökulsþjóðgarður verður spennandi og töfrandi verkefni. Þetta er stórt og mikið og ef allt gengur upp verður hér til stærsti þjóðgarður í Evrópu.
Það sem er framundan má segja að sé í ákveðnum skorðum. Við styðjumst við sameiginlega niðurstöðu úr mikilli vinnu sem var lögð í undirbúning og endaði í skýrslu ráðgjafanefndar, sem gefin var út haustið 2006. Þar eru lagðar línurnar um uppbygginguna fyrstu fimm árin, á hverju verður byrjað og hvar. Núna er staðan sú að ríkisstofnunin Vatnajökulsþjóðgarður er til, en eftir er að stofna þjóðgarðinn sjálfan. Beðið er eftir niðurstöðum úr samningaviðræðum við landeigendur og ábúendur á ýmsum jörðum sem eiga land, eða lönd sem lenda inn í þjóðgarðinum. Það er í höndum umhverfisráðuneytisins sem sér alveg um þau mál og við bara fylgjumst með því hvernig það gengur. Það eiga að liggja tilboð hjá öllum landeigendum og ábúendum um hvað ríkið er tilbúið að bjóða. Annað verkefni sem er í vinnslu bíður niðurstöðu úr áðurnefndu og er undanfari þess að hægt sé að stofna þjóðgarðinn, er reglugerð um Vatnajökulsþjóðgarð. Búið er að vinna ákveðin drög en ekki er hægt að ljúka við reglugerðina fyrr en fyrir liggur hver verða mörk þjóðgarðsins. Ég á von á að stofnun þjóðgarðsins verði í apríl eða maí eins og stefnt hefur verið að.
Næsta stóra verkefni á listanum er svo uppbygging í þjóðgarðinum.
Fyrsta verkefnið er bygging gestastofu á Skriðuklaustri. Farið var í arkitektasamkeppni og þegar vinningstillaga hefur verið valin verður hafist handa með hönnun og síðan farið í framkvæmdir með haustinu.
Í Skaftafelli eru áframhaldandi lagfæringar, og breytingar verða gerðar á Skaftafellsstofu. Skrifstofa verður flutt til, veitingasalan verður í austurenda hússins, sýningasalur í vesturenda hússins, og eins breytist verslunin í húsinu og byggist meira upp á munum sem tengjast garðinum. Nú er komin stór og góð matvöruverslun í Freysnesi og því óþarfi að vera með matvörur á báðum stöðum. Einnig erum við að fara af stað með uppbyggingu á landvarðarhúsi í Blágiljum á Lakasvæðinu og verið er að auglýsa eftir fólki til sumarstarfa á ýmsum stöðum. Landvarsla verður aukin í Skaftafelli og Jökulsárgljúfrum og ný landvarsla verður í Kverkfjöllum, Snæfelli, Hrauneyjum og í Nýjadal á Sprengisandi. Fastir starfsmenn eru þrír í Skaftafelli, þar af einn á Höfn, einn á vestursvæðinu og tveir á norðursvæði og fljótlega verður ráðinn þjóðgarðsvörður á Skriðuklaustri og í haust á Kirkjubæjarklaustri þar sem gestarstofa nr. 2 verður byggð. Gestastofa nr. 3 verður í Mývatnssveit og nr.4 á Höfn, sem ætti að verða tilbúin árið 2012".
Þess má geta að samkvæmt samþykkt stjórnar þjóðgarðsins yrði staðsetning framkvæmdastjóri látin ráðast af þvi hver yrði ráðinn og hvar hann byggi (athugasemd frá fréttamanni)
En um það hvort hann yrði með aðstöðu hér á Höfn og annarstaðar í þjóðgarðinum hafði hann þetta að segja:
"Við munum yfirtaka það húsnæði sem Umhverfisstofnun hefur í Nýheimum og þó ég hafi ekki sér herbergi þar þá er þar aðstaða til að setjast niður og sinna verkefnum. Sama er að segja um aðstöðuna í Skaftafelli. Þegar gestastofan á Höfn verður tilbúin verður þar aðstaða til að sinna verkefnum. Til að byrja með verður staðsetning framkvæmdastjóra í Reykjavík. Stjórnin hefur ákveðið að svo skuli vera fyrstu fimm árin, en málin verða endurskoðuð að þeim tíma liðnum.
Persónulega hentar mér þetta best sjálfum þar sem ég bý í Reykjavík, en það væri bara gaman að flytja út á land. Það eru bæði kostir og gallar við að hafa skrifstofuna í Reykjavík en ég held að kostirnir séu heldur fleiri. Við verðum að horfa til þess að garðurinn er svo víðfeðmur, ysti jaðar í norðri er í Öxarfirði og sá vestasti í Skaftárhreppi. Bara að ferðast á milli þessara svæða er meira en að segja það nema yfir hásumarið. Að vetrarlagi er þetta illleysanlegt nema í gegnum Reykjavík en ég hef fundið það á þessum stjórnarfundum okkar að áhugi er á því að hittast á öllum stöðunum svo auðvitað er þetta allt leysanlegt. Ég held að kosturinn við að hafa þetta í Reykjavík, til að byrja með á meðan uppbyggingin er mikil, sé sá að samgöngur þaðan til allra staðanna í þjóðgarðinum er illskárst ef svo má segja. Ég fékk smá sýnishorn af vetrarfærðinni núna í febrúar þegar ég var á Höfn og þurfti að fara akandi á Egilstaði. Þá var Fagridalur lokaður, snjóflóð við Breiðdalsvík og leiðin meira og minna lokuð. Þetta var þó ekkert stórmál og ferðin gekk vel.
Það verður spennandi að ferðast um svæðið og kynnast fólkinu sem tekur þátt í þessu verkefni og heyra þeirra hugmyndir um uppbygginguna í þjóðgarðinum".
Skrifa athugasemd