Esperantóþing á Hala
Það er von á góðum gestum í heimsókn á Hala um næstu helgi en þar verður haldinn aðalfundur Íslenska esperantósambandsins í Þórbergssetri 14. til 16. september með tilheyrandi skemmtun. Alls munu um 40 manns mæta á staðinn og dvelja í Suðursveit yfir helgina. Heiðursgestur á þinginu verður Tibor Szabadi frá Ungverjalandi. Tibor er félagi í Ungverska rithöfundasambandinu og hefur fengist við þýðingar úr ungversku á esperanto og einnig úr esperanto á ungversku. Hefur hann til dæmis þýtt bæði ljóð eftir Jónas Hallgrímsson (Gunnarshólma) og Vilborgu Dagbjartsdóttur eftir þýðingum á esperanto úr tímaritinu La Tradukisto sem íslenskir esperantistar gefa út. Tibor Szabadi mun á þinginu halda fyrirlestur um þýðingar bókmenntaverka með esperanto sem millimál.
Dagskrá fundarins er eftirfarandi:
- Lagt af stað úr Reykjavík (BSÍ) föstudaginn 14. september, klukkan 14.00, frá BSÍ.
- Leiðsögn á esperanto og íslensku.
- Komið að Hala um kl. 20.00 og drukkið kvöldkaffi þar
- Þórbergssafn skoðað
Laugardagur 15. september
- Morgunverður kl. 8.00-9.30
- Aðalfundur IEA kl. 10.00-11.00
- Fyrirlestur heiðursgestsins, Tibor Szabadi frá Ungverjalandi, um esperanto sem millimál við þýðingar kl. 11.00-12.00
- Hádegisverður kl. 12.00-13.00
- Ferð um Suðursveit og Hornafjörð kl. 13.00?18.00. Leiðsögn Hallgrímur Sæmundsson
- Kvöldverður á Þórbergssetri kl. 19.00
- Kvöldvaka kl. 20.00-22.00
Sunnudagur, 16. september
- Gengið verður um nánasta umhverfi á Hala fyrir hádegi. Þórbergssafn verður opið.
- Hádegisverður klukkan 12
- Haldið heim. Farið frá Hala upp úr hádegi
Hornfirðingar eru hjartanlega velkomnir að líta við í Þórbergssetri á laugardagskvöldið og taka þátt í kvöldvöku með esperantistum og kynna sér starfsemi Íslenska esperantosambandsins. Meðal íslenskra gesta er Hallgrímur Sæmundsson frá Stóra Bóli á Mýrum, einnig Austfirðingurinn Vilborg Dagbjartsdóttir skáld en hún var heimilisvinur á Hringbraut 45 hjá þeim Þórbergi og Margréti um árabil.
Skrifa athugasemd