Gera Suð-Austurland að þekktasta ferðaþjónustusvæði Íslands innan fjögurra ára
Útibú Landsbankans á Hornafirði og Útflutningsráð boðuðu til fundar í Nýheimum s.l. fimmtudag og var fundarefni framtíð ferðaþjónustu á Suðausturlandi. Þar flutti Agnar F. Helgason erindi um ferðaiðnað sem vaxandi atvinnugrein og Ari Skúlason talaði um framtíð og horfur á Suðausturlandi þar sem spurningin var "hvað ætla menn að gera?". Samantekt Ara var mjög fróðleg og uppörvandi. þar sem hann segir niðurstöður sínar vera nokkurn vegin þessar; í fyrsta lagi hvað er ég að reyna að gera, í öðru lagi hvað svæðið og greiningin á svæðinu segja mér og í þriðja lagi hvernig ég met möguleikana. (sjá nánar hér að neðan) Jóna Ingólfsdóttir bankastjóri útibús LÍ á Höfn segist vera mjög ánægð með fundinn, með úttekt þeirra landsbankamanna sem hingað hafa komið og ekki síður yfir hvað margir heimamenn komu á fundinn. Þessi fundur er í framhaldi af komu og úttekt Landsbankamanna til Hornafjarðar fyrir skömmu þar sem þeir ræddu m.a. við ferðaþjónustuaðila og bæjaryfirvöld.
Jóna segir að þetta sé viðurkenning á því starfi sem búið er að vinna í ferðaþjónustunni og einnig viðurkenning fyrir heildina því þarna eru þessir menn búnir að finna að það er enginn barlómur í fólki hér og farið hefur fram ákveðin hagræðing bæði í sjávarútvegi og landbúnaði sem virðist skila sér vel út í þjóðfélagið og eins að við erum ekki vælandi um hinar og þessar stofnanir frá ríkinu, að minnsta kosti skynja ég þetta þannig segir Jóna.
Hún vill koma á framfæri þakklæti til allra þeirra sem gáfu sér tíma til að koma á fundinn og við erum afskaplega ánægð með þessa vinnu, þetta virkar jákvætt á mig og starfsfólkið okkar, fyrir bankann í heild og gefur okkur byr í seglin.
Úr samantekt Ara Skúlasonar
Hvað ætla menn að gera!
- Öflug og arðbær ferðaþjónusta allt árið sem byggir á stórbrotinni náttúru, matvælum og menningu svæðisins
- Gera Suð-Austurland að þekktasta ferðaþjónustusvæði Íslands innan fjögurra ára
- Einstakt umhverfi Vatnajökuls, auðug menning, mannlíf og sérstaða í matvælum
- Fjölga ferðamönnum upp í 300 þúsund árið 2012
- Þreföldun á erlendum ferðamönnum utan sumartíma
- Lengja dvöl úr 1,5 nóttum í 2 nætur á annatíma
- Meðaldvöl verði 2 nætur yfir vetrartíma
- Göfug markmið - en eru ekki allir eru að reyna það sama?
Hvað segir svæðið mér:
- Ekki vandamálasvæði - ekki eilífur söngur í fréttum um nauðsyn opinberra inngripa
- Ekkert að bresta eða hverfa - ekki þarf að búa eitthvað til í staðinn
- Greinilega mjög traustur grunnur í sjávarútvegi
- Hagræðing hefur orðið bæði í landbúnaði og sjávarútvegi - menn leita að einhverju nýju í staðinn
- Þannig byrjar ferðaþjónustuáherslan - eðlileg viðbót ? ekki viðlagaúrræði.
- Samheldni og samvinna virðast ríkjandi
- Fólk virðist ekki leita mikið inn á miðsvæði Austurlands v. álvers og hærri launa - jafnvel möguleiki á að hýsing verkefna nái hingað
Hvað segir ferðaiðnaður á SA-landi mér
- Byggt á sérstöðu svæðisins - sumt einstakt
- Náttúran, jökullinn, myrkrið
- Matvælavinkill - hreindýr, humar, áll, villibráð ? fáir aðrir eiga þetta allt - Stokkseyri lifir á einu af þessu
- Spáð í "djarfar" framlengingar
- Enn meiri náttúra - risaþjóðgarður
- Myrkrið - norðurljósin
- Styttra flug frá Evrópu - lúxusferðamenn á einkaflugvélum
- Skemmtiferðaskip - kannski ekki mjög villt?
- Lenging á virkum tíma 80/20 í 60/40
Vöruþróun - ímyndir
- Stærri, vandaðri viðburðir eins og ráðstefnur sem byggja á ímynd
- Markviss stefnumótun - góð samvinna
- Hlutverk Nýheima
- Mikilvægt að hafa stofnun á staðnum sem spilar með atvinnulífinu
- Vöruþróun kallar á styrki og samstarf sem þarf sérfræðinga til að ná í
- Virk þátttaka sveitarfélags
Mat mitt á framtíð ferðaiðnaðar á svæðinu.
- Tel að hófleg bjartsýni eigi rétt á sér
- Grunnvinna orðin góð nú þegar - menn vita nokkuð vel hvar þeir eru staddir
- Spila vel úr þeim spilum sem eru á hendi
- Nýta aðferðir úr Hornafjarðarmanna?
- Ekkert er gefið og ekkert kemur af sjálfu sér!
Landsbankinn þekkir svæðið - vill vera með - en hann er ekki góðgerðarstofnun frekar en aðrir
Íhaldssemi og aðhald frá fjármálastofnun er nauðsynleg
Engum er greiði gerður með því að fá allt upp í hendurnar - kannski á röngum forsendum
Það þarf að tryggja að forsendur ákvarðanatöku séu réttar.
Skrifa athugasemd