20 ár frá því að FAS hóf formlega göngu sína
Þann 1. ágúst 2007 verða liðin tuttugu ár frá því að Framhaldsskólinn í Austur-Skaftafellssýslu hóf formlega göngu sína. Af því tilefni hefur verið ákveðið að gera starfsárið 2006 - 2007 að sérstöku afmælisári. Skipuð hefur verið afmælisnefnd sem í eiga sæti Eyjólfur Guðmundsson, Halldór Tjörvi Einarsson, Hjördís Skírnisdóttir og Zophonías Torfason. Ákveðið var að búa til afmælisvef þar sem komið yrði fyrir efni sem unnið verður í tilefni afmælisins. Kennarar í tveimur áföngunum sem kenndir voru á haustönn unnu einnig verkefni sem tengjast afmælinu. Þetta eru áfangarnir SAG403 sem Sigurgeir Guðjónsson kennir og í lífsleikni, LKN103, sem þær Hildur Þórsdóttir og Hjördís Skírnisdóttir kenna. Í sögu var unnið efni úr Eystrahorni en í lífsleikni voru tekin viðtöl við fyrrverandi nemendur og starfsmenn. Þessi verkefni birtast hér á vefnum.
Hér er þó ekki um lokaútgáfu á vefnum að ræða því áformað er að bæta við hann ýmsu efni. Líklegt er að einhverjar villur hafi slæðst með í texta og er beðist velvirðingar á því. Einnig er líklegt að fjölmargir eigi efni eða minningar sem eiga heima á þessum vef og er sérstaklega óskað eftir því að þeir komi því til nefndarinnar hvort sem það er fullunnið eða ekki.
Skrifa athugasemd