Samfylkingin á Hornafirði og í Suðurkjördæmi boðar til opins fundar með Björgvini G. Sigurðssyni og Róberti Marshall í Nýheimum í kvöld kl. 20:00. Fundurinn er liður í fundaherferð Samfylkingarinnar í Suðurkjördæmi þar sem frambjóðendur Samfylkingarinnar í kjördæminu hlusta og ræða við kjósendur. Samfylkingin á Hornafirði hvetur allt áhugafólk um stjórnmál til þess að mæta á fundinn og ræða við frambjóðendur Samfylkingarinnar. Björgvin G. Sigurðsson, alþingismaður skipar efsta sæti á lista Samfylkingarinnar eftir glæsilegan sigur í prófkjöri síðastliðið haust og Róbert Marshall skipar 3. sætið á framboðslistanum eftir glæsilegan árangur í sama prófkjöri. Lesa meira

Fyrsta ferðin á vegum Ferðafélags Austur-Skaftafellssýslu á þessu ári verður 25.mars, þá verður jeppa og fjöruferð í Hrómundarey í Álftafirði. Staðurinn er paradís þeirra sem hafa gaman af að leika sér á víðáttumiklum hreinum sandi, skoða fuglana og selina og njóta þess að vera við sjóinn. Von er á nýjum ferðabæklingi félagsins yfir það sem í boði er einhvern næsta dag. Eins og verið hefur eru ferðir félagsins skipulagðar þannig að auðvelt er fyrir flesta að finna þar eitthvað við sitt hæfi. Í sumar verður í fyrsta boðið upp á fimm daga ferð undir heitinu Náttúruperlur í Austur-Skaftafellssýslu. Okkur langar til að prófa þetta segir Rannveig Einarsdóttir formaður ferðafélagsins, við höfum selt hópum pakkaferðir þar sem í er aðgangur að jöklasýningunni, gisting hér á Höfn, rútuferð inn á Illakamb ásamt leiðsögn og er greitt fyrir það í einum pakka. Þeir sem einkum sækjast eftir svona ferðum eru aðallega Íslendingar þ.e.gönguklúbbar, samstarfshópar, saumaklúbbar og þ.h. Lesa meira

Nú styttist í Landsmót UMFÍ, en undanfarna daga hafa Hjarðarnesbræður, þ.e Rósaberg ehf, unnið við að skafa efsta lagið af íþróttavellinum, þeim hluta sem er nær Hafnarskóla og það fjarlægt. Síðan verður möl sett á völlurinn og hann hækkaður til samræmis við þann hluta vallarins sem er nær Víkurbraut. Fjarlægja þarf malarpúðann sem er á sundlaugargrunninum, um 4.500 rúmmetrar efnis, og verður hann notaður í upphækkunina á vellinum. Ofan á grófu mölina kemur væntanlega fín möl þá sandur og síðast gras. Vonandi verður hægt að byrja malartilflutninginn núna í vikunni segir Haukur Ingi Einarsson framkvæmdastjóri tækni og umhverfissviðs, þetta er mikið verk og hugsanlegt er að frost í jörð geti eitthvað tafið verkið helst þegar kemur að frágangi á vatnsfrárennsli frá vellinum. Sú vinna þarf að vera mjög nákvæm svo kerfið nái að skila vatninu frá sér. Lesa meira

Laugardagskvöldið 3. mars munu Öræfingar bjóða til Góugleði í Hofgarði. Hefur skemmtun þessi ávallt þótt takast vel og hefur fólk komið víða að. Æfingar fyrir skemmtunina þetta árið eru á fullu þessa dagana, maturinn verður einis og undanfarið framreiddur af þeim bræðrum Andra og Benedikt, hljómsveitin Síðasti Séns spilar fyrir dans. Veislustjóri verður Bjarni Harðarson frá Selfossi. Skemmtidaskrá verður flutt í lok borðhalds en hún samin af nefnd sem er samansett af heimamönnum og brottfluttum Öræfingum. Nýjustu fréttir herma að uppselt sé orðið á hófið. Lesa meira

Það er óhætt að segja að það var allt á fullu í dag, sunnudag, þar sem verið var að koma Nettó-versluninni í Miðbæ fyrir. Um 20 kvennakórskonur voru þar að þvo og þrífa, pússa og þurrka og gera allt skínandi hreint og fínt og var auðséð að þeim fannst þetta allt afar skemmtilegt og munurinn fyrir og eftir er meiriháttar. Nettó-strákarnir sem Gunnar Egill rekstrarstjóri kom með sér ,,að sunnan´´ voru byrjaðir að raða í hillur og von er á ,,birgjunum´´ á morgun. Verslunarstjórarnir þau Pálmi og Dísa létu ekki sitt eftir liggja í hreingerningum og öðru sem gera þarf. Þorgeir Kristjáns var mættur með hreinsigræjur sínar ásamt Snorra Snorrasyni umsjónarmanni í Miðbæ og fleiri iðnaðarmönnum. Lesa meira

Það var létt yfir sölufólkinu í Bestfisk-búðinni í dag enda nóg að gera og ekki stóð á góðum ráðleggingum um meðhöndlun og matreiðslu á margskonar fiskiréttum hjá kokki dagsins en hann nefnist Harald Baumann frá Berlín og talar íslenskuna ,,eins og innfæddur´´.Nýju réttirnir bera heitin; Las Vegas, Chilli Lime, Kókos Karry, Karry, Graslaukur Sinnep. Fjöldi manns mætti í dag til að versla fiskrétti og virðist greinilegt að Hornfirðingar vilja taka þátt í átakinu ,,Verum frísk –borðum fisk´´ Að sögn Sívars Árna Scheving framkvæmdarstjóri Bestfisks þá eru réttirnir að vekja gríðarlega mikla lukku og greinilegt að framtak fyrirtækisins með að opna fiskbúð er að virka. Lesa meira

Hópur starfsfólks, iðnaðarmenn og starfsmenn 11-11 og Nettó voru teknir til við breytingar og annað sem gera þarf á matvöruversluninni í Miðbæ kl.19.00 þegar verslun 11-11 var lokað og rekstri hennar þar með hætt. Helga Vignisdóttir verslunarstjóri 11-11 og Guðrún Valgeirsdóttir aðstoðarverslunarstjóri voru hressar og brosandi að vanda en þær ætla nú að snúa sér að öðrum viðfangsefnum en verslun, Helga fer heim að hugsa um nýfædda barnið sitt og heimilið en Guðrún ætlar að sjá um reksturinn á veitingastaðnum Víkinni. Hvað svo sem fólk segir um verslunina 11-11 og verðlagið þar er það á hreinu að starfsfólkið hefur staðið sig með prýði og það hefur ekki alltaf verið auðvelt fyrir afgreiðslufólkið við kassana að vera brosandi þegar viðskiptavinirnir voru grautfúlir yfir háu vöruverði í 11-11 Lesa meira

Nemendum grunnskólans gafst í gær og dag kostur á að fara í heimsókn í stjörnuver Snævarrs Guðmundssonar sem var sett upp í Sindrabæ. Stjörnuverið er kúluhús sem er eins og heimur útaf fyrir sig þar sem hægt er að einbeita sér að stjörnuskoðun og fræðast um gang himintunglanna, jafnvel þeirra fjarlægustu með aðstoð tölvutækninnar og skoðað geyminn undir leiðsögn Snævarrs sem er einn af þessum ekta náttúruunnendum og á einstaklega auðvelt með að fræða áheyrendur sína. Þetta var alveg ótrúlegt og spennandi að fara í stjörnuverið og við erum miklu fróðari um himingeyminn sögðu unglingarnir sem síðust fengu að fara í stjörnuverið og næsta víst er að þau eiga eftir að skoða stjörnurnar betur en áður. Lesa meira

Það var mikið um að vera í FAS í gær. Von var á góðum gestum frá ME og VA til að spreyta sig í ýmsum þrautum og leikjum. Heimsóknir þessar hafa verið fastir liðir í opinni viku undanfarin ár. Veðurguðirnir virtust eitthvað óhressir því ekki er hægt að segja að vel hafi viðrað til ferðalaga. Það fór því svo að það voru einungis gestir úr ME sem komu og birtust þeir í Nýheimum um hádegisbil dálítið soltnir en að öðru leyti vel haldnir. Eftir snæðing hófust leikarnir. Í Nýheimum var keppt í Hornafjarðarmanna og "Gettu betur" lið skólanna reyndu með sér. Í íþróttahúsinu var mikið fjör. Það var meðal annars keppt í: Bekkpressu, bandí, körfubolta-tilþrifum og armáti sem er nokkurs konar þrekkeppni. |nl| Lesa meira

Að venju verður öskudagur mjög óhefðbundinn dagur í Hafnarskóla og Nesjasóla. Í Hafnarskóla fram að fyrstu frímínútum voru nemendur að æfa atriðin sín og ljúka við búningana sína. Í skólanum var boðið upp á andlitsmálningu fyrir þá sem vildu. Að löngu frímínútum loknum var ball í skólanum þar sem kötturinn er sleginn úr tunnunni og fór það fram í Íþróttahúsinu. Þar tóku nemendur þátt í hæfileikakeppni og dönsuðu eins og þeir áttu lífið að leysa. Þar var besti búningurinn og besta atriði hæfileikakeppninnar valið. Skóladeginum lauk með því að börnin fóru um bæinn og syngja fyrir fólk að öskudagssið. Í Nesjaskóla hittust krakkarnir í Íþróttahúsinu í Mánagarði þar sem kötturinn var sleginn úr tunnunni. Lesa meira

Söngleikurinn Fiðlarinn á þakinu hefur nú verið sýndur sjö sinnum alltaf fyrir fullu húsi. Uppselt er á 8.sýninguna sem vera átti annað kvöld en þeirri sýningu hefur verið aflýst vegna veikinda og verða næstu sýningar á sunnudag og þriðjudag. Leikritið hefur verið geysilega vinsælt og leikararnir þykja skila sínum hlutverkum með mikilli prýði allir sem einn og sömu umsögn fá leikstjórnendur. Alls hafa tæplega 600 manns sótt sýningarnar og margir langt að komnir og von er á fleiri sýningargestum austan af fjörðum. Öræfingar fjölmenntu á ,,Fiðlarann´´ og sagði Pálína Þorsteinsdóttir í Svínafelli að það hefði verið ánægður hópur sem hélt heim að lokinni sýningu og bað hún fyrir eftirfarandi skilaboð frá þeim: Ungmennafélag Öræfa sendir hamingjuóskir til Ungmennafélagsins Mána með 100 ára afmælið og einnig til allra þeirra sem komið hafa að stórglæsilegri uppfærslu á Fiðlaranum á þakinu á þessum tímamótum. Lesa meira

Vegagerðin varaði í dag við miklu hvassviðri í Öræfasveit, Mýrdalssandi og undir Eyjafjöllum og fór vindhraði við Sandfell yfir 50m á sek. í mestu hviðunni. Um miðjan dag stórskemmdist fólksbíll sem var á austurleið milli Svínafells og Hofs, grjóthríð hafði brotið rúður í bílnum og lenti hann út af veginum.Tvennt var í bílnum ásamt hundi og fengu þau far til bæja með stórum jeppa sem kom þar að. Beðið var um aðstoð Drekans til að ná bílnum, en hann er eina örugga ökutækið í slíkum veðurofsa, og fór Ólafur Sigurðsson í Svínafelli ásamt björgunarsveitarmanni á staðinn en ekki tókst að koma bílnum til bæja vegna veðurofsans. Skólahald í Hofgarði féll niður í dag og sagði Pálína Þorsteinsdóttir skólastjóri að allt útlið væri á að eins yrði á morgun. Við fylgjumst vel með veðurhorfum og spám og hættum ekki á neitt með börnin. Lesa meira

Einn viðburða í opinni viku í FAS er ratleikur um Höfn. Það er varla hægt að segja að veðrið hafi leikið við þátttakendur í morgun. Fara þurfti á fimm mismunandi stöðvar og ekki mátti fara nema fótgangandi á milli staða. Á hverri stöð þurfti fyrst að svara nokkrum spurningum og til þess að fá vitneskju um það hvert ætti að fara næst þurfti að leysa þrautir. Fólk lét veðrið ekki aftra sér og geystist af stað enda góð verðlaun í boði. Sá hópur sem svaraði flestum spurningum rétt fær frítt inn á ballið á árshátíðinni á laugardag. Margir voru nú fremur blautir þegar komið var til baka í FAS eftir tæplega tveggja tíma útivist. Þegar búið var að fara yfir svör nemenda kom í ljós að það var hópur fimm sem bar sigur úr býtum en það voru þau; Sandra Rán, Steinunn, Einar Andrésson og Hólmar. Lesa meira

Samkaup Nettó fær afhent verslunarhúsnæði sitt í Miðbæ á föstudaginn kl.19.00 þegar 11-11 verður lokað og Kaupás hættir verslunarrekstri á Höfn. Hópur fólks úr Nettó búðunum kemur austur og vinnur við uppsetningu verslunarinnar ásamt heima-starfsfólkinu og stefnum við á að opna um hádegi á þriðjudaginn þannig að fólk geti náð í helstu nauðsynjavörur þó ekki verði búið að ganga frá öllu segir Gunnar Egill Sigurðsson rekstrarstjóri í Nettó. Formleg opnun verður 2. mars, þá opnum við fullbúna búð með góðum tilboðum og öllu tilheyrandi. Það er venja að vera með sértilboð þegar ný verslun opnar og svo eru góð tilboð um allar helgar. Lesa meira

Þá er svartasta skammdegið afstaðið, ný önn hafin í Hafnarskóla og í nógu að snúast sem þykir bæði gott og eðlilegt í skólastarfi. Til að brjóta aðeins upp hversdagsleikann verður breytt út af hefðbundinni kennslu í skólanum í nokkra daga. Í dag sprengidag er hópadagur þar sem nemendur hafa valið sig í hina ýmsu hópa til að vinna í fram að mat. Veiðihópurinn lenti í hremmingum vegna veðurs en Ásgeir og Grétar sáu við veðurhamnum og fóru með nemendur í skoðanaferð um Skinney-Þinganes. Í dýrahópnum er mikið fjör, nokkrir nemendur komu með gæludýrin sín og síðan er unnið að fræðsluefni sem tengist dýrunum, danshópurinn dansar freestyle, vísindahópurinn er í óða önn að æfa geimskot, kvikmynda-og ljósmyndahóparnir eru á góðri leið með sína vinnu og svo mætti lengi telja. Í hópavinnunni leggjum við áherslu á ábyrgð nemenda á vali sínu og um leið þann árangur sem hópavinnan skilar segir Þórgunnur Torfadóttir skólastjóri. Í hádeginu, frá kl. 12:20 eru foreldra og aðstandendur boðnir velkomnir í skólann til að líta á afrakstur hópastarfsins. Þá verður opnað m.a. lítið kaffihús þar sem nemendur, foreldrar og starfsfólk getur sest niður og fengið sér gott í gogginn fyrir lítilræði. Eftir hádegi verður lögð lokahönd á undirbúning fyrir öskudag. Lesa meira

Bílaleiga Flugleiða, Hertz sem áður var með umboðsaðila sinn hér í Sveitarfélaginu á Hornafjarðarflugvelli leitar nú að nýjum umboðsmanni á Höfn. Flugfélagið Ernir sem tók við rekstri flugstöðvarinnar um áramót mun ekki taka við umboðinu. Starfssvið hins nýja umboðsmanns verður útleiga bifreiða, sala til viðskiptavina, þrif og standsetning ásamt uppgjöri og frágangs reikninga. Að sögn Hreins Sigmarssonar flotastjóra bílaleigunnar mun áfram verða hægt að fá bílana afhenta á flugvellinum þó svo að umboðið verði þar ekki. Hreinn vildi fyrir hönd bílaleigunnar þakka Vigni Þorbjörnssyni fyrir frábært samstarf á liðnum árum. Lesa meira

Opna vikan í FAS var formlega sett í morgun af skólameistara. Strax í kjölfarið fór hið árlega Framhaldsskólamót í Hornafjarðarmanna fram. Það var útbreiðslustjórinn sjálfur Albert Eymundsson sem hafði veg og vanda að mótinu og fjarstýrði því af Snæfellsnesinu. Þátttakan var mjög góð og spiluðu rúmlega 50 manns. Eins og áður var það Ósinn sem gaf verðlaun fyrir þrjú efstu sætin. Þegar yfir lauk eftir tæplega þriggja tíma spilamennsku voru úrslitin ljós. Elva Björk Olgeirsdóttir náði fyrsta sætinu og er því Framhaldsskólameistari í Hornafjarðarmanna árið 2007. Í öðru sæti var Steinþór Benediktsson og Albert Þórir Sigurðsson varð þriðji. Lesa meira

Eigendaskipti urðu á Versluninni Lóninu í byrjun janúar þegar hjónin Laufey Óladóttir og Sigurjón Gunnarsson keyptu verslunina af Guðnýju Helgadóttur og Hákoni Gunnarsyni. Verslunin var opnuð í gær, föstudag, eftir gagngerar breytingar og stækkun á verslunarplássi en verslunin var lokuð í nokkra daga meðan unnið var að breytingunum. |nl|Vöruúrval verður með svipuðu móti og verið hefur nema það að við verðum ekki með raftæki eða rafmagnsvörur til sölu segir Laufey, það verður hér fatnaður á alla fjölskylduna ofan 12 ára aldurs. Mest af fatnaðinum er dönsk gæðavara og vörumerkin þau sömu og verið hafa í Lóninu einnig úr og rafhlöður, símar og skartgripir einnig er stefnt á að verða með gjafavöru. Lesa meira

Næstkomandi laugardag gefst Hornfirðingum kostur á að hlýða á fyrirlestra um furður himingeimsins í Þórbergssetri á Hala í Suðursveit. Snævarr Guðmundsson fjallaleiðsögumaður kemur með stórt stjörnuver með sér, sem sett verður upp á staðnum. Hægt er að fara inn í stjörnuverið og þar inni sýnir Snaævarr jafnvel fjarlægustu himintungl með aðstoð tölvutækninnar. Einnig flytur Snævarr fyrirlestur um stjörnur og stjörnuskoðun og norðurljósin. Hér er um einstakt tækifæri að ræða að fræðast um himingeiminn á nýstárlegan hátt. Þeir sem ekki sjá sér fært að sækja alla dagskrána geta komið á einstaka fyrirlestra. Á laugardeginum 24. febrúar er fyrirlestur kl. 14:00 um stjörnur og heimsókn í stjörnuverið kl. 16:00, en getur hafist fyrr ef næg þátttaka er. Á sunnudeginum 25. febrúar er síðan fyrirlestur um norðurljósin klukkan 11:00. Snævarr er mikill náttúruunnandi og hefur lagt fyrir sig stjörnuskoðun og ljósmyndun. Snævarr hefur verið með sama efni á námskeiðum í Reykjavík. Lesa meira

Nokkuð hefur verið rætt undanfarið um minnkandi fiskneyslu Íslendinga og er hún að nálgast fiskneyslu margra Evrópulanda sem ekki þykir gott eða heilsusamlegt. Þetta er ótrúlegt þar sem við eigum greiðan aðgang að úrvalsfiski í miklu úrvali og ekki vantar uppskriftirnar og leiðbeiningar um matreiðslu og meðhöndlun á fiski. Hornfirðingar þurfa ekki annað en fara í fiskvinnslurnar hér á staðnum og kaupa fisk sem er á lámarksverði og þar eru gæðin í fyrsta flokki. Á morgun mun Bestfisk-Búðin verða með til sölu, auk venjulegs úrvals af fiski, nýja gómsæta fiskirétti í sósu og einnig í mareneringu. Búðin verður opin frá kl.11-17. Lesa meira

Nú er hægt að horfa á SkjáVarp í beinni á netinu. Tilraunaútsendingar hafa staðið yfir í nokkra mánuði og hafa heppnast mjög vel. Upplýsinga- og auglýsingamiðillinn SkjáVarp sendir út í gegnum UHF sjónvarpssendi frá Höfn og næst útsendingin á Höfn, í Nesjum og á Mýrum. Til að senda út SkjáVarp á netinu er merkið tekið beint frá sjónvarpsútsendingunni og breytt fyrir netútsendingu með sérstökum útsendingar-netþjóni. Með þessu næst nú SkjáVarp allsstaðar í Sveitarfélaginu Hornafirði þ.e. hjá þeim sem eru nettengdir en áður náði útsending SkjáVarps til 93% íbúa Sveitarfélagsins. Brott fluttir Hornfirðingar geta nú fylgst með því hvað er um að vera í Sveitarfélaginu og fylgst með útsendingu bæjarstjórnarfunda. Síðasti bæjarstjórnarfundur var m.a. sendur út og að sögn áhorfanda í Danmörku "þá var það mjög gaman að fylgjast með því sem var að gerast heima í bæjarmálum" Lesa meira

Mai K. Nicolaisen hestatanntæknir kemur til Hornafjarðar mánudaginn 19. febrúar n.k. og verður með fyrirlestur í Nesjaskóla um vandamál sem geta komið upp tengd tönnum í hrossum og hvernig má meðhöndla alvarlegri tanngalla, rétta bitskekkjur ofl. Daginn eftir tekur hún að sér verkefni fyrir hestamenn á Hornafirði eftir tímapöntunum. Mai er sú fyrsta í Skandinaviu sem er menntaður hestatanntæknir og hefur lokið hæsta prófi í sértækum skóla í Bandaríkunum frá alþjóðlegum samtökum hestatanntækna (IAED). Siðustu sex árin hefur hún starfað við iðnina i Danmörku þar sem hún er vel þekkt og viðurkennd í starfi. Röspuninn hjá Mai endist í a.m.k. eitt ár og jöfnunin á bitinu 3-4 ár (eða alltaf). Hún meðhöndlar alvarlegri tanngalla og réttir bitskekkjur. "Það er algengt að hross forðast að láta safna sér í höfuðburð eða að sveigja háls til hliðana vegna hvassra tannbrodda, bitskekkju og lítíð pláss aftast í munni", segir Mai. Lesa meira

Sveitarfélagið Hornafjörður hefur lengi þótt standa framalega þegar rætt er um tæknivæðingu og það sem henni viðkemur, allar stofnanir Sveitarfélagsins á einu ljósleiðaraneti til fjölda ára, bæjarstjórnarfundir hafa verið sendir út um sjónvarpsrás til bæjarbúa frá 1998 eða í tæp 10 ár og nú hið allra nýjast er að bæjarstjórinn, Hjalti Þór Vignisson bæjarstjóri hefur opnað blogg síðu þar sem hann ætlar að segja frá ýmsu í starfi sínu og hvað er efst á baugi í stjórnsýslunni. Að sögn Hjalta er þetta liður í að auka enn frekar upplýsingaflæði frá stjórnsýslunni og gefa íbúum betri tækifæri á að fylgjast með starfsemi bæjarins. Lesa meira

Framkvæmdir á Hótel Höfn eftir að kviknaði í því þann 7. febrúar s.l. ganga vel. Það er enn verið að rífa niður og fjarlægja það úr húsinu sem eyðilagðist við brunann og af reyk, sagði Gísli Már sem er einn hóteleiganda þegar fréttamaður vefsins heyrði í honum í dag. Fyrsta hæðin er algjörlega fokheld því þar þurfti að rífa allt burt inn að steini, bara steypan eftir. Ennþá er ekki ljóst hvað mikið er ónýtt á efri hæðum hótelsins og eftir því sem rótað er við fleiru þar koma meiri skemmdir í ljós svo það er engan veginn hægt að gera grein fyrir því ennþá hvað tjónið er mikið. Við vonumst þó eftir að það hafi sloppið nokkuð vel en það eru ljóst að allt það sem eitthvað lím er í eða hlutir með eða úr taui er ónýtt, sama er að segja um alla síma, sjónvörp og öll rúm verða endurnýjuð. Gísli segir að herbergin uppi hafi vera mis illa farin af reyk og þar verði allt tekið í gegn og þegar við opnum aftur verður þar allt í 100% lagi. Í voru starfsmenn frá Loftstokkahreinsun mættir til að loftræsta Hótelið en það getur tekið um viku til 10 daga. Lesa meira

Nú líður að úrslitum um hvert verður framlag Íslands í forkeppni Söngvakeppni evrópskra sjónvarpsstöðva. 9 lög eru eftir sem keppa til úrslita á laugardagskvöld (17. feb.) og er eitt þeirra "Eldur" í flutningi Friðriks Ómars og lag eftir þá feðga Grétar Örvarsson og Kristján Grétarsson. Nú hafa stuðningsmenn Friðriks Ómars opnað "myspace-síðu" fyrir söngvarann og lagi. Þar segir m.a. "Það fer ekkert á milli mála að við styðjum lagið "ELDUR" sem Friðrik Ómar flytur, einfaldlega vegna þess að okkur finnst lagið gott og grípandi og svo er Friðrik frábær flytjandi. Við lítum svo á að tími sé til kominn að senda eitthvað annað en gamlar eurovision stjörnur sem sýnir Evrópu engan veginn hversu marga góða söngvara við eigum. "ELDUR" er lagið sem kemur okkur upp úr riðlinum úti í Helsinki og í aðalkeppnina. Erlendar eurovision síður hafa fylgst vel með gangi mála í forkeppninni hjá okkur og eru flestir á því að ELDUR sé eina lagið sem eigi möguleika á góðu gengi í keppninni í ár. Lesa meira

Það er í mörg horn að líta hjá unga fólkinu á Hornafirði þessa dagana. Á fimmtudag var haldið hið árlega þorrablót Heppuskóla í Sindrabæ og þar var glatt á hjalla, spaugað, sprellað og dansað þar sem ungmennahljómsveitin ANTIK hélt uppi stuðinu. Síðan rekur hver viðburðurinn annan hjá unga fólkinu. Innan skamms fer fram söngvakeppni Samtaka félagsmiðstöðva á Austurlandi sem félagmiðstöðin Þrykkjan sér um að þessu sinni. Verður hún haldin í íþróttahúsinu á Höfn næstu helgi þ.e. laugardaginn 17. febrúar kl. 20. Þar koma söngatriði frá félagsmiðstöðvum á Austurlandi sem keppa um rétt til að taka þátt í söngvakeppni Samtaka félagsmiðstöðva á Íslandi ( SAMFÉS ) sem fram fer í Laugardalshöllinni laugardaginn 3. mars n.k. Öllum er heimill aðgangur að söngvakeppni SAMAUST í íþróttahúsinu gegn 500 kr. gjaldi. Væri gaman að sem flestir sæju sér fært að kíkja inn og hlusta á ungmennin taka lagið. Lesa meira

Landsamband slökkviliðs- og sjúkraflutningamanna (LSS) efndi til árlegs Eldvarnarátaks dagana 23.-30.nóvember 2006 í samstarfi við Brunamálastofnun, Slökkvilið landsins, 112 og fleiri aðila. Slökkviliðsmenn heimsóttu nær alla grunnskóla landsins, þar sem 8 ára börn voru frædd um eldvarnir og öryggismál og gáfu þeim kost á að taka þátt í Eldvarnagetrauninni 2006. Slökkviliðið á Hornafirði lét ekki sitt eftir liggja og heimsóttu skólabörnin í sínu umdæmi eins og þeir gera á hverju ári. Börnin eru bestu eldvarnarmennirnir á heimilunum því þau eru dugleg að minna foreldrana á það sem gera þarf til að allar eldvarnir séu í lagi segir Steinþór Hafsteinsson slökkviliðsstjóri, t.d. kaupa reykskynjara eða rafhlöður í þá sem til staðar eru, fá slökkvitæki á heimilið eða yfirfara þau sem fyrir eru og fara yfir hvað gera skal ef kviknar í. Það er svo auðvelt að ná til krakkanna og þau eru ótrúlega dugleg að fá foreldra sína eða forráðamenn til að taka á þessum málum heima fyrir og það er ósjaldan sem foreldrarnir segja þegar þeir koma að kaupa reykskynjara eða annan öryggisbúnað ,,það er enginn friður fyrir krökkunum fyrr en búið er að kaupa þetta og setja upp". Lesa meira

VATNAJÖKULL er einstakt náttúrufyrirbæri. Það er því ekki að ósekju að um árabil hafi verið rætt um að stofna þjóðgarð til heiðurs jöklinum. Frumvarp um stofnun Vatnajökulsþjóðgarð, sem dreift var á Alþingi í desember, ber vitni um metnað fyrir náttúruvernd og markvissa uppbyggingu þjónustunets þjóðgarðsins. Hinn nýi þjóðgarður verður sá stærsti sinnar tegundar í Evrópu og margir telja að hann hafi ótvírætt gildi á heimsvísu. Fyrirhugað er að byggja fjórar nýjar þjónustumiðstöðvar umhverfis jökulinn til viðbótar við þær tvær sem nú eru til staðar – í Skaftafelli og Jökulsárgljúfrum. Auk þess er gert ráð fyrir að byggja upp fjölda smærri upplýsingamiðstöðva og gestastofa. Ef þessi áform ganga eftir verður það mikilvægur áfangi í náttúruvernd á Íslandi og lyftistöng fyrir byggðina umhverfis Vatnajökul. Lesa meira

Fuglaathugunarstöð Suðausturlands hlaut Umhverfisverðlaunin fyrir árið 2006 og eru verðlaunin eru veitt fyrir að safna gögnum og upplýsingum um fugla og vekja þannig athygli á sérkennum staðarins í náttúrufarslegu tilliti. Verðlauna afhendingin fór fram í Nýheimun í gær og við afhendingu þeirra sagði Sigurlaug Gissurardóttir meðal annars: Það fer vel á að vekja með formlegum hætti athygli á því sem vel er gert. Að fá klapp á bakið er öllum nauðsynlegt og getur skipt sköpum fyrir viðkomandi sem oft á tíðum er að vinna að verkefnum, þar sem árangur er kannski ekki svo sjáanlegur, bæði þeim sem að vinnur sem þeim sem fjær standa. Vinna að umhverfismálum er einmitt þannig verkefni að árangur er oft á tíðum ekki sýnilegur og vekur kannski frekar eftirtekt ef ekkert er gert. Lesa meira

Loðnuveiðiskipin Jóna Eðvalds og Krossey lönduðu í morgun hjá Skinney Þinganesi , Jóna var með 480 t. og Krossey með rúmlega 500 tonnum. Vertíðin byrjar vel þessa daga sem af henni eru og stutt á loðnumiðin. Ef loðnan er í góðu lagi vinnum við 400 tonn af loðnu í frystingu á sólarhring og svo erum við með fjóra 900 tonna hráefnisgeymslutanka og það magn tekur um viku að vinna upp sagði Gunnar Ásgeirsson. Netavertíð er að fara af stað og hafa tveir bátar Skinneyjar Þinganess lagt net sín. Lesa meira

Í vikunni hafa nemendur í 1.-6. bekk æft dans af fullum krafti undir dyggri stjórn Jóns Péturs. Þetta er fjórða árið sem hann kemur hingað og dansar með börnunum. Fyrst árið var hann einungis með dans í Nesjaskóla fyrir 1.- 3. bekk en síðan hefur danskennslan fylgt þeim árgöngum og færst upp. Stefnt er að því að smám saman verði allur grunnskólinn í danskennslu. Í danskennslunni er höfuðáhersla lögð á að börnin hafi gaman, þori að hreyfa sig frjálslega og snertast án fordóma. Í dag var foreldrum boðið á danssýningar bæði í Mánagarði og Íþróttahúsinu á Höfn. Þar sýndu nemendur hvað þau hafa lært í vikunni og svo sannarlega lifðu þau sig inn í dansinn. Lesa meira

Í útvarpsþætti Hjálmars Sveinssonar, Krossgötur sem er á dagskrá Rásar 1 á laugardögum er fjallað um ýmis mál, möguleikar í stöðu þeirra skoðaðir og velt fyrir sér vandamálunum. Undanfarið hefur hann m.a. fjallað um ýmislegt sem snýr að sjávarútvegi, m.a. stefnubreytingu í íslenskri sjávarútvegsnýsköpun og hefur hann fjallað um hvort það sé framtíð í sjávarlífi og sjávarnytjum. Hjálmar var hér á ferðinni í vikunni og leit hann við í Nýheimum þar sem hann hitti Guðmund H. Gunnarsson hjá Matís og Ara Þorsteinsson hjá Frumkvöðlasetrinu og tók við þá viðtal um störf þeirra og ekki síst varðandi rannsóknir á humri og uppbyggingu humarhótelsins. Ari upplýsti Hjálmar um Frumkvöðlasetrið og Nýsköpunarstarf á landsbyggðinni. Einnig ræddi hann við Þorvarð Árnason forstöðumann Háskólaseturs í Nýheimum um uppbyggingu og gildi þekkingarsetra eins og Nýheima og hvað slík setur gera fyrir lífið á landsbyggðinni. Lesa meira

Frá áramótum hefur Fiskimjölsverksmiðjan Skeggey ehf unnið 5000 tonn af síldar og loðnumjöli sem að sögn Björns Emils Traustasonar verksmiðjustjóra er mun meira en á sama tíma í fyrra. Mest af þeirri loðnu sem nú veiðist fer í vinnslu til manneldis aðeins smærri loðnan fer í bræðslu. Um miðjan um miðjan s.l. miðvikudag voru tuttugu skip að veiðum rétt utan við Hornafjarðarós en eftir 4-5 tíma var veiðin búin þar sagði Björn og í morgun héldu skipin austur með landi til veiða.. Loðna virðist vera hér um allan sjó og nóg af henni en erfitt að veiða hana meðan hún er svona dreifð. Mjög gott verð fæst nú fyrir loðnu og síldarmjöl og segir Björn það í sögulegu hámarki ein sé mjög gott verð fyrir loðnuna sem unnin er í frystingu. Lesa meira

Í gær var skrifað undir kaupsamning milli Sveitarfélags Hornafjarðar og Hótels Hafnar um kaup á íbúðum Sveitarfélagsins við Víkurbraut 11 og 13. Að sögn Hjalta Þórs Vignissonar bæjarstjóra þá er það stefna sveitarfélagsins að fækka íbúðum í sinni eigu og er sala íbúðanna við Víkurbraut liður í þeim áfanga. Um leið og Hjalti óskaði þeim hóteleigendum til hamingju með nýja húsnæðið lagði hann áherslu á að það væri mikilvægt hverju byggðarlagi að hafa innan sinna raða athafnafólk eins og eigendur Hótel Hafnar, þeir sjá sóknarfæri í atvinnulífinu og nýta þau. Slík atorka er einmitt það sem til þarf til að bæjarfélagið blómstri enn frekar. |nl| Lesa meira

Sjálfshjálparhópur fyrir einstaklinga með ADHD ( athyglisbrest, ofvirkni og skyldar raskanir) hefur nú fengið nýjan fundarstað. Hópurinn heldur fundi í Rauða krosshúsinu við Hafnarbraut á sunnudagskvöldum kl. 21:30. Fundirnir eru ætlaðir fólki frá 16 ára aldri og á fundunum deilir fólk reynslu sinni og öðlast betri skilning á ADHD með því að hlusta á reynslu annara. Markmiðið með fundunum er að fólk finni að það er ekki eitt, fái styrk til að halda áfram og fái betri sýn á hvað hægt er að gera til að bæta lífsgæðin. Allir þeir sem eru með ADHD eða telja sig vera í þeim hópi eru hvattir til að mæta á fundina í Rauða kross húsinu. Nánari upplýsingar gefur Jón Sölvi Ólafsson í síma 847-5456. Tilgangur með fundunum er að deila reynslu styrk og von. Stöndum saman því þannig verðum við sterkari. Lesa meira

Slökkvilið Hornafjarðar hefur verið að störfum á Hótel Höfn við að reykræsta eftir brunann í dag. Ljóst er að um mikið tjón er að ræða vegna reyks um allt hótelið og vatnsskemmda á fyrstu hæð en þar eru öll gólfefni ónýt. Talið er að upphaf eldsins hafi verið í gufuklefa sem er á jarðhæð hótelsins en hann hefur ekki verið í notkun um tíma. Að sögn Gunnars Inga Valgeirssonar lögreglumanns þá er verið að rannsaka eldsupptökin og ekki enn ekki ljóst hvað nákvæmlega orsakaði hann. Um kl. 16:20 fór brunakerfi hótelsins af stað og brást starfsfólk strax við og leitaði að eldi, ekki fannst neitt við fyrstu skoðun en stuttu síðar gaus upp rekur á jarðhæðinni og þar þá hringt strax í neyðarlínuna. Aðeins 2-3 mínútum síðar var fyrsti slökkviliðsmaður mættur á staðinn en hann hafði verið að vinna í næsta húsi. Stuttu síðar var slökkviliðið mætt með alla sína bíla og réðst til atlögu við eldinn. Lesa meira

Allt tiltækt slökkvilið, lögregla og sjúkrabifreið voru kölluð út að Hótel Höfn um kl.16.30 í dag. Að sögn sögn Sigurðar Guðnasonar varstjóra hjá lögreglunni á Höfn eru eldsupptök talið hafa átt upptök sín í gufuklefa sem ekki var í notkun. Mikill reyk lagði frá Hótelinum dreif fólk víða að til að fylgjast með störfum slökkviliðsins. Ekki urðu meiðsl á fólki. Reykafarar frá slökkviliðinu fóru inn í reykhafið og tókst slökkviliðinu vel að ráða niðurlögum eldsins. Lesa meira

Fyrsta verkefni Vegagerðarinnar í Hornafirði á þessu nýbyrjaða ári er gerð varnargarða vestan Skeiðarár sem Héraðsverk ehf. sér um samkvæmt útboði verksins. Þá styttist í að byrjað verði á brúargerð á Staðará í Suðursveit og einnig mun ákveðið að einbreiða brúin yfir Smyrlabjargará hverfi og sett verði rör í veginn í stað hennar. Það verður þó enginn skortur á einbreiðum brúm á þjóðvegi eitt frá Höfn að sýslumörkum á Skeiðarársandi því eftir því sem starfsmanni Vegagerðarinnar taldist til munu þær vera alls sextán og átta til viðbótar sé haldið áfram þjóðveg eitt til Reykjavíkur. Það er brúarvinnuflokkur frá Vík sem sér um brúargerðina einnig eiga þeir mikið óunnið við Jökulsárbrú á Breiðamerkursandi svo sem við að sandblása og mála brúna o.fl. sem ekki tókst að ljúka við á síðasta ári vegna óhagstæðra veðurskilyrða. Lesa meira

112 dagurinn verður haldinn á vegum viðbragðsaðila í björgun og almannavörnum um allt land sunnudaginn 11. febrúar næstkomandi. Að þessu sinni verður dagurinn helgaður margvíslegum störfum sjálfboðaliða að forvörnum, leit og björgun, almannavörnum og neyðaraðstoð. Megináhersla verður lögð á að kynna starf sjálfboðaliðasamtakanna og mikilvægi þess. Markmiðið með 112 deginum er að kynna neyðarnúmerið og starfsemi aðilanna sem tengjast því, efla vitund fólks um mikilvægi þessarar starfsemi og hvernig hún nýtist almenningi. Markmið dagsins er enn fremur að efla samstöðu og samkennd þeirra sem starfa að forvörnum, björgun og almannavörnum. Lesa meira

Bæjarstjórn Hornafjarðar boðaði til borgarafundar í Holti á Mýrum í gærkvöldi þar sem m.a. var rætt um þau þrjú vegstæði sem helst koma til greina yfir Hornafjarðarfljót. Árni Þorvaldsson formaður bæjarstjórnar bauð fundargesti velkomna og því næst útskýrði Hjalti Þór Vignisson bæjarstjóri hvernig undirbúningur stæði og lýsti þeim fjölmörgu atriðum, lögum og umhverfissjónarmiðum sem afgreiða þarf áður en endanleg ákvörðun er tekin. Bæjarstjórnarmenn eru sammála um að leið 3, sem kemur sunnan við Hafnarnes sé vænlegasti kosturinn og eru tilbúnir til að beita sér fyrir því að sú leið verði valin. Margir fundarmanna tjáðu sig um vegstæðin þrjú og það merkilega var að allir voru sammála því að velja bæri leið þrjú, það væri hagkvæmast jafnvel þó sú vegalagning tæki lengri tíma. Lesa meira

Sala fasteigna í Sveitarfélaginu Hornafirði og á Djúpavogi gekk vel á árinu 2006 og skiptu alls 60 eignir um eigendur. Þetta gekk mjög vel hjá okkur á sl. ári segir Sigríður Kristinsdóttir á Fasteignasölunni Hrauni, og nýja árið byrjar vel. Þessar 60 eignir sem seldust eru bæði íbúðar og atvinnuhús. Meiri hluti þessa viðskipta er milli heimamanna og svo til fólks sem flutt hefur hingað. Góð eftirspurn er eftir leiguhúsnæði einkum eftir stórum íbúðum en það er erfitt að leigja út litlar íbúðir t.d.tveggja herbergja íbúðir. Sigríður segir að leigumarkaðurinn sé í alveg þokkalegu jafnvægi og nokkurn veginn hægt að anna eftirspurn, helst er að vanti stórar íbúðir og það fer að koma að því að þörf er fyrir meira leiguhúsnæði. Við erum enn að selja eignir langt undir byggingarkostnaði en þetta er að breytast og við finnum fyrir því að fasteignaverð stígur rólega og það er greinilega á uppleið. Lesa meira

Á skemmtilegu yfirlitskorti, sem birt var á heimasíðu Skinneyjar-Þinganess, mátti sjá staðsetningu loðnuskipa sem þá voru að veiðum rétt út af Hornafirði. Einn línubátur var á svæðinu innan um loðnuskipin og væntanlega hefur aflinn verið rýr á línuna ef loðna hefur verið í einhverju mæli á svæðinu. Vefur Fiskifrétta Skip.is náði tali af Borgþóri Torfasyni, skipstjóra á netabátnum Erlingi SF, fyrir í dag en hann var þá á netaveiðum á svipuðu svæði og loðnuskipin voru á í gær. Lesa meira

Ýmislegt áhugavert rekur oft á fjörur, eins er það með aðsent efni og ábendingar sem berast vefnum. Meðfylgjandi myndir eru teikningar sem listamaðurinn Oliver Krugler teiknar ferðablað Gardian og er hans dagbók í teikningum á leið sinni frá Skotlandi til Kúbu. Þessi skemmtilegi liður í ferðablaðinu gengur undir nafninu "Kugler'w World". Ísland var einn af viðkomustöðum Olivers á þessari leið og gisti hann nótt hér í ríki Vatnajökuls í apríl á síðasta ári hjá Ásmundi og Helgu í Árnanesi. Á leið sinni upp á Vatnajökul sem væntanlega byrjaði niður í bæ (Höfn) rakst hann á hóp af víkingum sem drukku bjór og átu epli eins og hann komst að orði og sjá má á meðfylgjandi teikningu. Lesa meira

Fyrir stuttu kynnti Stella Sigfúsdóttir, markaðs- og ferðamálafræðingur, helstu niðurstöður frumkönnunar á fýsileika þess, að reisa heilsulind í ríki Vatnajökuls. Kynningarfundurinn var haldinn í sal Nýheima og var mjög vel sóttur. Því miður skaraðist fundartíminn að hluta til við mikið kveðjuhóf, til heiðurs starfsfólki Flugfélags Íslands á flugvellinum á Höfn og reyndist því sumum áhugasömum aðilum ókleift að koma á kynningarfundinn að þessu sinni. Til gamans má geta þess, að þetta var þriðja tilraun Stellu frá því í október að koma austur á Höfn til að kynna niðurstöðurnar. Hún varð tvisvar frá að hverfa vegna óveðurs! Þar sem hún er nú að vinna í verkefni erlendis, þá er ekki hlaupið að því fyrir hana að “skjótast” hingað austur. Lesa meira

Starfsmannastjóri Nettó kom til Hornafjarðar í vikunni til að ræða við og ráða starfsfólk í Nettó verslunina sem opnar í Miðbæ um næstu mánaðarmót. Sturla Eðvarðsson framkvæmdastjóri Samkaupa-Nettó sagði Skúla starfsmannastjóra hafa átt góðan fund með starfsfólki og er búið að ganga frá einhverjum ráðningum þó nokkrir lausir endar séu ennþá. Við eru að skoða hvernig opnunartími hentar best og eins að skoða aðrar aðstæður á þessum nýja stað okkar sem við viljum þjónusta sem best. Ekki er ljóst hvort við getum opnað 1.mars en vonandi verður það þó unnið verði að uppsetningu í versluninni á meðan opið er. Alla vega munum við gera okkar besta til að fólk fái góða þjónustu þó ekki verði allt frágengið í versluninni fyrstu dagana. Lesa meira

Undankeppni Íslandsmeistaramótsins í HornafjarðarMANNA fer fram í kvöld hjá Brynjari í Heitu og Köldu við Grensásveg 10. Þriggja manna úrslit fara síðan fram á Þorrablóti Hornfirðinga á höfuðborgarsvæðinu sem verður annað kvöld þ.e. laugardagskvöldið 3. febrúar í félagsheimilinu á Seltjarnarnesi. Það er í fyrsta skipti sem Undankeppni Íslandsmeistaramótsins er spilað á veitingahúsinu Heitt og Kalt hjá Brynjari og hefst mótið kl. 20:00. Á þessum mótum hefur verið góð mæting og þrátt fyrir keppnishörku og svolitla spennu í spilamennskunni hefur fólk átt notalega kvöldstund og gamlir vinir og kunningjar spjallað saman. Góð verðlaun eru og tengjast að sjálfsögðu Hornafirði. Á síðast móti milli hátíða þar sem níutíu spilarar kepptu varð Hans Christienssen Hornafjarðarmeistari 2006 eftir bráðabana og mikla spennu í úrslitakeppninni. Lesa meira