Hjóla frá Reykjavík til að taka þátt í Frönskum dögum
Á þriðjudagskvöld kom til Hafnar 5 manna hópur hjólreiðamanna sem eru að hjóla frá Reykjavik til Fáskrúðsfjarðar til að taka þátt í Frönskum dögum á Fáskrúðsfirði sem fara fram næstu helgi. Ferðalangarnir eru frá 11 til 53 ára, allir Fáskrúðsfirðingar sem búa bæði á Fáskrúðsfirði og höfuðborgarsvæðinu. Ferðin er farin í 8 áföngum, þ.e ferðin frá Reykjavík til Fáskrúðsfjarðar farin á 8 dögum. Hver áfangi ferðarinn er frá 70-115 km. Síðasti áfanginn áður en til Hafnar var komið var frá Hofi í Öræfum til Hafnar sem eru 110 km. Hópurinn gisti á tjaldstæðinu á Höfn og hét þaðan í gær til Djúpavogs.
Hugmyndin fæddist á Tour-de Fáskrúðsfjörður sem er hjólreiðarkeppni sem haldin er á Frönskum dögum og þar sem hátíðin er nú haldin í 10 skipti var ákveðið að hjóla frá Reykjavík til Fáskrúðsfjarðar. Að þessu sinni verður ekki formleg Tour-de Fáskrúðsfjörður því að heimamenn ætla að taka á móti hópnum á Stöðvarfirði og hjóla með síðasta áfangann til Fáskrúðsfjarðar. Þeir sem hjóla heita Björgvin Snær Ólafsson, Ólöf Brynja Aradóttir, Guðbjörn Margeirsson, Jóhanna Hauksdóttir og Eyþór Friðbergsson
Skrifa athugasemd