Einstakur árangur í meistaraprófsritgerð
Fréttir bárust frá skrifstofum Kaupfélagsins af einstökum árangri fyrrverandi fjármálstjóra, Guðmundi V. Friðjónssyni, í meistaraprófsritgerð frá Viðskiptaháskólanum í Árósum. Guðmundur varði ritgerð sína í síðustu viku í Árósum og náði þeim einstaka árangri að fá einkunnina 13, sem er hæsta einkunn sem gefin er á dönskum skala. Guðmundur undirbýr nú ritgerðina til fjölföldunar þar sem hann ætlar að leita eftir styrkjum í verkið og hafa prófessorarnir við alþjóðadeild Viðskiptaháskólans í Árósum hvatt hann til frekari umfjöllunar og útgáfu. Efnið er mjög mikið í umræðunni á öllum norðurlöndunum vegna hugsanlegrar aðildar Íslands og Noregs að Evrópusambandinu og Danmerkur og Svíþjóðar að Evrusvæðinu.
Guðmundur og fjölskylda fóru til náms í Danmerkur sumarið 2002 er þau fluttu frá Hornafirði. Þau höfðu þá búið hér á Höfn frá árinu 1996 eða í sex ár en á þeim tíma starfaði Guðmundur sem fjármálastjóri Kaupfélagins. Guðmundur útskrifaðist sem viðskiptafræðingur frá Háskóla Íslands árið 1989. Að námi loknu starfaði hann hjá Þjóðhagsstofnun til ársins 1996 er fjölskyldan flutti til Hafnar. Hugurinn stefndi í frekara nám og hóf Guðmundur meistaranám við Viðskiptaháskólann í Árósum haustið 2002, í fjármálum og alþjóðaviðskiptum. Meistaranámið tekur tvö ár eftir að grunnámi (BS gráðu) er lokið úr háskóla. Á síðustu önn meistaranámsins skrifa menn lokaritgerð, sk. meistararitgerð, sem er sjálfstætt rannsóknarverkefni sem hver meistaranemi þarf að gera til að ljúka námi.
Ritgerð Guðmundar fjallaði um hagkvæmni norðurlandanna til að ganga í myntsamstarf, í samanburði við löndin innan Evrusvæðisins. Samanburðurinn byggðist á hagfræðikenningu um hagkvæmni myntsvæða sem á ensku nefnist ?The Optimal Currency Area Theory?. Í ritgerðinni eru norðurlöndin, sem eru fyrir utan Evrusvæðið, Ísland, Noregur, Danmörk og Svíþjóð, borin saman við öll tólf löndin sem mynda Evrusvæðið, með tilliti til þess hvernig þau uppfylla skilyrði til að vera meðlimir í slíku myndsamstarfi, samkvæmt ofangreindri kenningu. Að sögn Guðmundar eru niðurstöðurnar ekki hagstæðar okkur Íslendingum né Norðmönnum einkum vegna þess hversu einsleidd hagkerfi landanna eru og frábrugðin hagsveiflum í stærstu löndum Evrusvæðisins.
Skrifa athugasemd