Hvað eru Glitský og hvers vegna birtast þau?
Óvenju mikið var um glitský í gær og mikil litadýrð. Margir hringdu í fréttamenn hjá Hornafjörður.is og mikið var um að fólk væri að taka myndir af litadýrðinni sem blasti við á annars heiðum himni í morgunbirtunni nú þegar dagurinn er einu hænufeti lengri en í gær. Einars Sveinbjörnssonar deildarstjóra hjá Veðurstofunni segir að glitský, einnig nefnd perlumóðurský eða ísský myndist í heiðhvolfinu gjarnan í um 25 km. hæð. Venjuleg ský eins og við þekkjum þau helst ná sjaldnast á okkar slóðum upp fyrir 12 km hæð eða upp að endimörkum veðrahvolfsins við veðrahvörfin. Glitskýin samanstanda af örsmáum ískristöllum, sem myndast við þegar sá litli raki sem til staðar er þetta hátt upp nær að þéttast við sérstakar aðstæður. Glitskýja er helst að vænta um miðjan vetur og eftir sólarlag og fyrir sólaruppkomu geta þau verið böðuð sólskini, þótt aldimmt sé við jörð. Tilurð þeirra tengist myndun mikils kuldahvirfils yfir norðurpólnum sem nær hámarki í desember og janúar.
Það er árvisst að Veðurstofunni berist tilkynningar um glitský og algengast er að til þeirra sjáist frá norðan- og norðaustanverðu landinu. Oftar sæist til glitskýja hér á landi, ef ekki væri fyrir þá sök að yfir hávetratímann er æði oft er skýjað af lægri skýjum sem byrgir sýn til efri hluta lofthjúpsins. Ljósbrigði glitskýjanna verða vegna ljósbrots sólargeisla. Ætla má að frostið upp í 25 km. hæð sé nú á milli 80 og 90 gráður.
Þess má geta að orðið perlumóðurský er komið úr norsku að ég hygg, en þar er talað um Perlemorsky og ekki er vísað til móðu heldur móður segir Einar
Skrifa athugasemd