Vel lukkaður fjölskyldudagur
Fjölskyldudagurinn sem haldinn var á Höfn sl. laugardag tókst með ágætum og það er mikil og almenn ánægja með þennan fyrsta formlega fjölskyldudag og greinilega mikill áhugi á að svona fjölskyldudagur verði haldinn árlega í byrjun vetrar. Mjög góð aðsókn var að þeim stöðum sem voru opnir og var aðgangur ókeypis. Í Nýheimum var sitt hvað til skemmtunar s.s. söngur, upplestur, nemendur tónskólans léku, sagðir brandarar og fl. Allir fengu pizzusneið, djús eða kaffi í boði sveitarfélagsins og eins fengu þeir sem voru að skemmta sér í íþróttahúsinu pizzusendingu og drykk úr Nýheimum. Litaboltafélagið var með aðstöðu í gámi við Sindrahúsið og þar gátu allir fengið að prufa þessa nýju tómstundaiðju. Tvær bíósýningar voru í Sindrabæ í boði Skinneyjar Þinganess og Félagsmiðstöðin með sínum tækjum og búnaði var öllum opin.
Sporthöllin bauð fjölskyldum frían aðgang að tækjunum frá kl. 10 ? 13 og sagði Svava Mjöll Jónasar að fullt hefði verið í salnum allan tímann og mikið fjör.
Margir lögðu leið sína í íþróttahúsið og léku sér þar bæði börn og foreldrar einnig tók íshokki-hópurinn einn leik.
Sýningin Handverk og Hönnun opnaði í Pakkhúsinu á laugardaginn og komu þangað 130 manns og góð aðsókn var einnig á sunnudaginn.Sýningin verður aftur um næstu helgi. Jöklasýningin var opin á fjölskyldudaginn og þangað komu rúmlega 50 manns og eftir lokun fengum við 100 manna hóp sagði Inga Jónsdóttir hjá Menningarmiðstöðinni. Hugmyndina að fjölskyldudeginum átti Elín Magnúsdóttir formaður bæjarráðs.
Skrifa athugasemd