Íslandsmet í Almannaskarði
Verktakinn við jarðgangagerðina í Almannaskarði, Leonhard Nilsen og Sönner frá Noregi og Hérðasverk ehf, komu galvaskir aftur til starfa miðvikudaginn 28. júlí eftir tveggja vikna sumarhlé. Þá voru göngin 299 m að lengd að sunnanverðu. Nú í dag, miðvikudaginn 4. ágúst, eru göngin hins vegar orðin 405 m að lengd og hafa því lengst um 106 m á einni viku. Hér er um glæsilegt Íslandsmet að ræða í tvíbreiðum veggöngum. Sprengt var 21 sinni í vikunni og lengdust göngin því um 5 m í hverri sprengingu að jafnaði. Þrátt fyrir þessi miklu afköst í metrum talið þá var bergið ekkert sérstaklega gott og þurfti að sprauta steypu á nánast hverja sprengifæru (5-7 m3 í hvert sinn). Auk þess voru settir upp 8-12 bergboltar í hverja sprengifæru til að styrkja bergið.
Fyrri metafköst í tvíbreiðum veggöngum (eða sprengdum göngum af sambærilegri stærð) voru um 80 m á viku hjá Ístak í Hvalfjarðargöngum og Fáskrúðsfjarðargöngum og hjá Impreglio í aðgöngum Kárahnjúkavirkjunar. Hér er því um verulega metbætingu að ræða hjá verktökunum í Almannaskarði. Nú er því búið að sprengja um 35 % af heildarlengd jarðganganna sem verða 1.150 m að lengd. Einnig hefur verið unnið við að steypa þrifalög undir vegskálann að norðan, samsetningu móta og járnabindingu og annan undirbúning fyrir skálabygginguna.
Skrifa athugasemd