Hjólað í vinnuna á Hornafirði
Á mánudaginn var fyrsti keppnisdagur í “Hjólað í vinnuna” en keppnin stendur yfir frá 17. maí til 28. maí. Á fyrsta degi höfðu 110 fyrirtæki með 172 lið skráð sig til keppni og eru skráðir liðsmenn um 1.000. Samkvæmt stöðulista í gær var Sveitarfélagið Hornafjörður í 5. sæti af 20 sveitarfélögum, en fimm fyrirtæki eða stofnanir eru skráð til keppni á Hornafirði. Glæsilegir viðurkenningarskildir verða veittir fyrir þrjú efstu sætin í hverjum fyrirtækjaflokki. Nú er bara um að gera fyrir Hornfirsku fyrirtækin sem þátt taka í keppninni að taka vel á og skila mörgum kílómetrum í hús og allir hinir sem ekki eru skráðir til keppni sýna stuðninginn í verki og hjóla, labba eða skokka í vinnuna.
Svo er um að gera að nýta þá orku og þann kraft sem menn fá út úr þessu átaki til undirbúnings undir Kvennahlaupið sem verður 19. júní n.k.
Skrifa athugasemd