Eggjatökuferð í Ingólfshöfða maí 2004 ©RF

Ingólfshöfði

Ingólfshöfði er 76 metra hár klettahöfði suður af Fagurhólsmýri. Höfðinn er um 1200 metra langur og 750 metra breiður. Hamrar höfðans snúa til sjávar í suðurátt, en sandalda gengur upp að honum norðanverðum. Á höfðanum eru jafnt grasi gróin svæði sem hrjóstrug urð og grjót. Á sumrin eru hamrarnir þéttsetnir fuglum og má þar helst nefna lundann sem er einkennandi fyrir höfðann. Ingólfshöfði dregur nafn sitt af landnámsmanninum Ingólfi Arnarsyni sem er sagður hafa haft vetursetu þar fyrsta vetur sinn á Íslandi. Árið 1974 var Ingólfi reistur minnisvarði í höfðanum og um leið var Ingólfshöfði friðlýstur.

Í Ingólfshöfða var áður fyrr mikið um fuglaveiðar og eggjatöku við erfiðar aðstæður. Fjöldi skipa strandaði á söndunum beggja vegna höfðans og árið 1912 var  reist skipbrotsmannskýli á höfðanum sem stendur enn. Vitinn á Ingólfshöfða var byggður árið 1916 og endurbyggður árið 1948.  Vitinn sinnir umferð á sjó auk þess sem radíoviti leiðbeinir flugvélum í flugi milli Íslands og meginlands Evrópu.
 
Skemmtilegt er að gera sér ferð í höfðann.  Öruggast er að ferðast þangað með þeim sem eru kunnugir þar sem leiðin getur verið varasöm vegna sandbleytu á leirunum. Einnig getur sandurinn verið mjög þurr þegar nær dregur höfðanum svo erfitt reynist að aka um hann. Akstur ökutækja er ekki leyfður á Ingólfshöfða en öllum er velkomið að ganga um hann.

Tengt efni:

Eggjataka í Ingólfshöfða