Fláajökull

Mynd Ragnar Th. Sigurðsson

Fláajökull

Vatnajökull með öllum sínum mikilfenglegu jökultungum er mikið aðdráttarafl fyrir ferðamenn. Þannig hefur ógnin sem fólst í nálægð jökulsins áður, snúist í tækifæri til ferðaþjónustu.  Einn skriðjöklanna sem ganga suður úr Vatnajökli nefnist Fláajökull.  Allstórt manngert lón er framan hans og þar hafa tvær gönguleiðir verið merktar og sett upp fræðsluskilti. Önnur er tileinkuð baráttu íbúa við jökulvötnin og byggingu varnargarða en hin er tileinkuð  jarðfræði svæðisins og nær hún inn að jökulstálinu við austursporð Fláajökuls, undir bröttum hlíðum Fláfjalls.  Greiðfær vegarslóði er inn að Fláajökli. Sjá gönguleiðarkort.

Um tíma leit út fyrir að byggð legðist af á Mýrum vegna ágangs jökla og vatnsfalla frá þeim. Upplagt er að rölta um jökulöldurnar og reyna að setja sig í spor fólksins sem árið 1937 barðist með handaflinu og aðstoð þarfasta þjónsins við að hemja jökulvötnin.  Algengur skriðhraði skriðjöklanna er um einn metri á dag og eru þeir mikilvirkir í mótun landsins.  Framan þeirra má víða sjá háa jökulgarða eða öldur. Nýlegar rannsóknir benda til þess að jöklar á Mýrum hafi náð mestri útbreiðslu undir lok átjándu aldar og náð aftur svipaðri útbreiðslu undir lok þeirrar nítjándu. Eftir það tók við hlýskeið með hopun jöklanna. Mælingar sýna að síðastliðin hundrað ár hefur Fláajökull hopað um rúma tvo kílómetra. Við þessa hopun hefur komið undan jökli land sem þekur tæpa 20 km².