Austur-Skaftafellssýsla

Vatnajökull, stærsti jökull utan heimskautasvæðanna liggur að baki byggðar á Suðausturlandi.  Jökulhvelið ber við himininn ásamt háum skriðurunnum fjöllum. Tugir skriðjökla teygja sig niður á láglendið og frá þeim falla ótal jökulár sem  hafa með aurframburði myndað víðáttumikla sanda og sandstrendur.  Hægt er að komast  niður í fjöru á nokkrum stöðum.  Nálægð jökulsins er mikil og í aldanna rás hefur hann í senn verið ógnvaldur og lífgjafi íbúa Austur Skaftafellssýslu. Víða er gott aðgengi að skriðjöklunum og eftir vegi   F 985 er hægt að komast upp á Vatnajökul, við Jöklasel.  Jökullinn og helstu áhrifasvæði hans hafa verið friðlýst sem þjóðgarður, Vatnajökulsþjóðgarður.  Það má því með sanni segja að ferðalangar sem leið eiga um Austur-Skaftafellssýslu séu komnir í ríkiVatnajökuls.

Hornafjörður er blómstrandi samfélag í ríki Vatnajökuls.  Íbúar í  sveitarfélaginu eru liðlega 2000, þar af búa um 1700 manns á  Höfn í Hornafirði, sem er öflugur útgerðarbær.  Fjölbreytt þjónusta er í boði á Höfn og er  staðurinn þekktur fyrir humarinn enda sannkallaður höfuðstaður humarsins í norðri.

Auk stórkostlegrar náttúru og útsýnis sem á sér vart hliðstæðu er í Ríki Vatnajökuls að finna fjölbreytta þjónustu og afþreyingu fyrir ferðamenn s.s. hótel, bændagistingar, veitingahús, tjaldstæði, verslanir, sundlaugar, söfn og sýningar, gönguleiðir og golfvöll.  Einnig jeppaferðir, sleðaferðir, fjórhjólaferðir, hestaferðir, gönguferðir á jökul,  ísklifur, útsýnisflug, siglingu á Jökulsárlóni og er þá ekki allt upptalið. Ríki Vatnajökuls er því sannkölluð ferðamannaparadís og nær frá Lómagnúpi í vestri að Hvalnesi í austri.  Á ferðalagi þínu um heimasíðuna eru örnefni og þjónusta í Ríki Vatnajökuls, jafnan listuð upp frá vestri til austurs.