Hnappavallahamrar í Öræfum eru stærsta og vinsælasta klettaklifursvæði á Íslandi þó svo að ekki sé mörgum heimamönnum kunnugt um það á Hornafirði. Örnefnið Hnappavallahamrar á í raun aðeins við um klettabeltið sem nær frá Sandskarði við Salthöfða í vestri og austur til Stekkatúnshamra en þeir eru lágt klettabelti sem liggur norður frá Hádegishamri í átt að Hnappavallabæjum. Öræfaferðir á Hofsnesi hafa notað klettaklifursvæðið töluvert og farið þangað með skólakrakka í skólaferðalögum í klettaklifur og sig, auk þess sem stundum hafa aðstæður verið til að halda ísklifurnámskeið í fossum í hömrunum sem eru í klakaböndum yfir vetrartímann. Austan undir Miðskjóli er tjaldstæði í skjóli hamranna á fallegum stað. Þó er þetta ekki skipulagt tjaldstæði en landeigendur á Hnappavöllum hafa leyft klettaklifursáhugafólki að tjalda þarna án endurgjalds svo framalega sem að þeir gangi vel um svæðið sem þau gera. Lesa meira