Mýrar í Austur Skaftafellssýslu

Sun, 3 May 2009 00:00:00 +0000

Sveitin Mýrar í Austur-Skaftafellssýslu liggur á milli Suðursveitar í vestri og Nesja í austri. Vesturmörk sveitarinnar eru úr Hafrafellshálsi um Hánípu til sjávar austan Sævarhólalands, en austurmörk eru við Hornafjarðarfljót. Mýrar eru einn hinna gömlu hreppa sem sameinuðust í Sveitarfélagið Hornafjörð. Sveitin er einstök perla fyrir alla þá sem áhuga hafa á jöklum, landmótun jökla, jarðfræði, fuglalífi, náttúruskoðun og útivist. Sögustaðir og menningarminjar eru við hvert fótmál. Aðgengi að jöklum er á fáum stöðum auðveldara og hvergi hefur sambýli manna við jökla verið nánara en á landræmunni sunnan Vatnajökuls, þar sem jöklar hafa gengið hvað næst mannanna byggðum hér á landi. Ef frá er talið fjalllendið við jökulröndina, einkennast Mýrar af miklu flatlendi og víðáttu, eins og nafnið gefur til kynna. Dreifing bæjarstæða endurspeglar baráttu íbúa við jökulvötnin, en þau eru nær öll staðsett á lágum holtum sem standa upp úr flatlendinu. Gönguleiðir á Mýrum eru fjölbreyttar og ná yfir margar landgerðir, frá fjöru til fjalla. Vegna þess hversu flatlent er henta vegslóðar sem liggja út frá þjóðvegi 1 vel til hjólreiða og viljum við sérstaklega mæla með þeim ferðamáta.

Ríki Vatnajökuls - Mýrar

Mýrar í Austur Skaftafellssýslu