Í næsta nágrenni

eru margir áhugaverðir staðir sem eru þess virði að heimsækja.

 

Verið óhrædd við að leita eftir aðstoð.  Við veitum hana fúslega með bros á vör.

• Við veitum gestum okkar allar upplýsingar um áhugaverða staði í Ríki Vatnajökuls.
• Bæklingar og aðrar upplýsingar eru í móttöku og í upplýsingamöppum á herbergjum.
• Fjölbreyttar gönguleiðir eru í nágrenninu - gönguleiðarkort eru til sölu í afgreiðslu og þau er hægt að nálgast hér á vefnum: Mýrar, Nes, Suðursveit. (pdf) 
• Fláajökull
• Útivistar- og skógræktarsvæði í Haukafelli
• Hlustað á tónlist náttúrunnar
• Fuglaskoðun – fjölbreytt fuglalíf er umhverfis Brunnhól  
• Fjöruferðir – greiðfær vegslóði er niður á fjörur 

 

Kirkjan á Brunnhóli er sóknarkirkja íbúa á Mýrum.  Árið 1899 var kirkja flutt úr Holtum á Slindurholt í Brunnhólslandi.  Um 1950 var kirkjan endurbætt og öðru sinni í byrjun 21 aldar. Sjá fleiri myndir af Brunnhólskirkju hér.

 

Fláajökull hefur hopað á þriðja km s.l. öld.  Við gerð nýjasta varnargarðs framan jökulsins myndaðist jökullón.  Akfært er eftir varnargarðinum og frá austurenda hans er hægt að ganga að jöklinum austanverðum eftir merktri gönguleið. 

 

Í tíðum jökulhlaupum var allt láglendi sveitarinnar oft umflotið beljandi vötnum. Árið 1937 var ráðist í gerð varnargarða sem beindu vötnunum í einn farveg.  Hopunarsögu jökuls og baráttusögu mannsins við jökulvötnin hefur verið gerð skil í kaldri gestastofu og með fræðsluskiltum við merkta gönguleið framan við Fláajökul.

 

Eskey lætur ekki mikið yfir sér og óvíða er betra útsýni yfir Mýrar en þaðan.  Þar eru fræðslu- og örnefnaskilti og merkt gönguleið.  Á hverju vori verpir hrafn í klettunum sunnan á Eskey.

 

 

Heinabergsón ásamt fjalllendi, dölum og jökulöldum í nágrenninu eru hluti af nýjum Vatnajökulsþjóðgarði.  Allnokkuð er að hreindýrum á þessum slóðum.

 

 

Brúin yfir Heinabergsvötn var mikið mannvirki á sínum tíma og er þögult vitni um hversu baráttan við vötnin reyndist oft á tíðum erfið. Skömmu eftir að hún var byggð breyttu Heinabergsvötn um farveg og renna nú í Kolgrímu. Eftir stendur brúin á þurru landi, þögult vitni um óútreiknanleg náttúruöfl.  

 

Fjaran vekur alltaf forvitni allra aldurshópa.  Frá Brunnhóli er auðveldast að komast niður í fjöru með því að aka eftir vegslóða skammt austan við Hólmsá.  Við ráðleggjum gestum að leggja bílnum við Skinney.

 

 

Útivistarsvæði í eigu Skógræktarfélags Austur-Skaftafellssýslu.  Auk þess að planta trjám í svæðið hefur félagið komið upp tjaldsvæði og þar er þjónustuhús með salerni og rennandi vatni.  Veðursælt er í Haukafelli og þar eru merktar gönguleiðir og fræðsluskilti.