Björgunarfélag : Fréttir
Sleðamenn frá Höfn finna týnda jeppamenn
Útkall berst Björgunarfélagi Hornafjarðar kl.00:20 síðustu nótt vegna manna sem farið höfðu upp á Vatnajökul en ekkert samband hafði verið við þá síðan á föstudagskvöld og óttuðust því ættingjar um afdrif þeirra. Kl.01:14 voru tveir snjósleðamenn lagðir af stað frá stjórnstöðinni á Höfn og tveir jeppar stuttu síðar, Sleðamennirnir voru komnir upp í Jöklasel kl. 02:40, þaðan sem þeir héldu strax áleiðis í Kverkfjöll en þar var talið að mennirnir gætu verið, sleðamennirnir leituðu af sér allan grun þar, fóru þaðan beint inn í Grímsfjöll þar sem mennirnir fundust heilir að húfi kl. 07:10. Mennirnir voru á Willis jeppa sem hafði bilað en þeir höfðu ekki nein fjarskiptatæki til að geta gert vart við sig.
Tveir jeppar og snjóbíll frá Hjálparsveit Skáta í Reykjavík sem voru staddir við Humarkló þar sem þeir voru á æfingu um helgina slógust í för með jeppum Björgunarfélagsins á Höfn við Jöklasel og hélt leitarhópurinn áleiðis til Kverkfjalla en var síðan snúið að Grímsfjalli þar sem mennirnir fundust. Reiknað er með að hópurinn komi til byggða um miðjan dag í dag.
Björgunarsveitir á austurlandi voru einnig kallaðar út og héldu inn að Snæfelli þar sem þeir fóru upp á jökul og héldu þaðan inn í Kverkfjöll en var snúið við þegar að sleðamennirnir frá Höfn fundu mennina.
Enn á ný hafa Björgunarsveitarmenn á Höfn sýnt að viðbragðsflýti þeirra er eindæmum góð og þrotlausar æfingar björgunarsveitarmanna skila sér þegar á hólminn er komið þar sem tími getur skipt sköpum um líf og dauða.
Guðbrandur Jóhannesson var stjórnandi leitarinnar í stjórnstöðinni á Höfn
